Hopp til innhold
X
Innhald

Solveig Muren Sanden

Solveig Muren Sanden, biletkunstnar og teikneserieskapar. Ho er den ukrona dronninga av norsk teikneserieteikning.

Sanden var fødd i Vrådal 17. april 1918 og døydde 22. november 2013. Etter utdanning frå Statens kunst- og handverksskule og frå Statens kunstakademi i Oslo spesialiserte Sanden seg på målarkunst. Då ho fekk selt nokre teikningar til ymse blad, mellom dei Jol i Telemark, satsa ho også på illustrasjonskunst. Det gjorde ho med bravur.
 
Foto: Olav Norheim.
Foto: Olav Norheim.
 
Sanden teikna Tuss og Troll like sidan 1957 (bladet kom i opptrykk 1988–91) og Smørbukk 1959–80 (julehefta 1960–81), men takka nei til å teikne Vangsgutane òg. Dei fekk Jens R. Nilssen ha for seg.
 
Ho teikna dei siste Tuss og Troll-stripene i 2008, då var ho nitti år gamal.
 
Saman med Johannes Farestveit fekk ho i 1974 den første prisen Kyrkje- og undervisningsdepartementet delte ut til teikneserieskaparar, for beste norske teikneserie for barn eller unge. I 2004 fekk ho Trollprisen under Eventyrfestivalen i Heidal, for den unike framstillinga av norske eventyr.
 
Sanden var æresmedlem i Smørbukks Vener og har fått Kongens fortenstmedalje i sølv.
 
Solveig Muren Sanden teikna heilt fram til ho døydde i 2013, 95 år gamal.
 
Kjelder
Ottar Grepstad: Viljen til språk. Ei nynorsk kulturhistorie. Oslo 2006
Eirik Helleve: Striper, ruter, bobler. Hovdebygda 2003
nrk.no: Solveig Muren Sanden er død: http://www.nrk.no/telemark/solveig-muren-sanden-er-dod-1.11380410 

Først publisert: 25.09.2009
Sist oppdatert: 11.02.2014