Faktaboks

Tine Sundtoft

Kristine Sundtoft

Fødd
19. april 1967, Lillesand, Aust-Agder
Tine Sundtoft i 2015.
Tine Sundtoft i 2015.
Av /NTB.

Tine Sundtoft er siviløkonom, tidlegare fylkesrådmann i Vest-Agder og tidlegare klima- og miljøminister i regjeringa Solberg i 2013–2015.

Bakgrunn

Kristine (Tine) Sundtoft er fødd i Lillesand i Aust-Agder (no Agder). Ho gjekk på Møglestu videregående skole i 1982–1985 og blei siviløkonom etter å ha studert økonomi og leiing ved Handelshøyskolen BI i Oslo i 1986–1990. Frå 1995 til 2005 var ho tilsett som regiondirektør i Næringslivets Hovedorganisasjon (NHO) i Agder.

Politisk karriere

Ho har brei erfaring og kunnskap om norsk næringsliv og offentleg forvaltning, og frå partipolitikk både lokalt, regionalt og nasjonalt. Sundtoft var kommunestyrerepresentant i Lillesand for Høgre i 1987–1991, medlem og gruppeleiar for partiet i fylkestinget i Aust-Agder i 1991–1995. I 1990–1992 var ho generalsekretær i Unge Høgre. Sundtoft var politisk rådgivar for stortingsgruppa til Høgre fram til 1995 og var vararepresentant til Stortinget for Høgre frå Aust-Agder i 1989–1993.

I 2005–2013 var ho fylkesrådmann i Vest-Agder fylkeskommune og vart då den første kvinnelege fylkesrådmannen i fylket. Frå 2013 til desember 2015 var ho klima- og miljøvernminister i regjeringa Solberg. Som klima- og miljøvernminister ville Sundtoft ha eit generasjonsperspektiv på politikken og føre vidare klimaforliket som Stortinget vedtok i 2012.

Andre verv og utmerkingar

Sundtoft var medlem av styringsgruppa for NODE (Norwegian Offshore & Drilling Engineering), ei næringsklynge for teknologibedrifter, fram til ho blei statsråd. Ho fekk Agderrådets likestillingspris i 2009, mellom anna for arbeidet med leiarutviklingsprogrammet Female Future, og blei kåra til årets kvinnelege leiar på Sørlandet i 2013.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg