Ingvil Smines Tybring-Gjedde

Ingvil Smines Tybring-Gjedde er fødd i Oslo. Ho var elev ved Kristelig gymnasium i 1981–1984, blei NDT-teknikar ved Force Institutes i Danmark i 1991 og tok grunnfag i marknadsøkonomi ved IB i Stavanger i 1996–1997. Ho var ferdig med ein bachelorgrad i internasjonalisering og leiing i 1999 og tok to mastergradar i Management Program ved BI i 2001–2002 og 2004–2005.

Ho arbeidde ved Fornebu Lufthavn i 1986–1987, var dagleg leiar ved Ut-veg as i 1988–1990, opplærings- og sikringsleiar ved TKT AS i 1990–1992 og seksjonsleiar ved Grøner Offshore 1992–1994. Frå 1999 til 2005 arbeidde ho først som prosjektkoordinator og deretter som leiar for petroleumskompetanse ved BI i Stavanger. Ho arbeidde som regionsansvarleg og seinare sektorleiar for Innovasjon Noreg i 2005–2010 og 2011–2014 og var seniorrådgivar i Utanriksdepartementet i 2010–2011 og 2014–2015. Ho er gift med Christian Tybring-Gjedde.

Tybring-Gjedde var styreleiar i Frogner FrP i 2010–2015 og varamedlem i bystyret i Oslo i 2011–2014. Frå 2015 til 2019 var Tybring-Gjedde statssekretær i Olje- og energidepartementet, før ho overraskande blei utnemnt til statsråd som minister for samfunnstryggleik i den utvida regjeringa Solberg. Tybring-Gjedde var den første ministeren for samfunnstryggleik. I tillegg til ansvar for beredskapen i Justisdepartementet fekk ho også ansvaret for Polaravdelinga og for tryggleikslova og administrativt ansvar for Nasjonal Sikkerhetsmyndighet i Forsvarsdepartementet. Ho gjekk av som statsråd da Framstegspartiet trakk seg frå regjeringa i januar 2020.

Tybring-Gjedde var president i Hafrsfjord Rotary i 2006, styremedlem i Familiestiftelsen i 2008–2009 og styremedlem i Solvang ASA i 2006–2010. Ho var vararepresentant i Kringkastingsrådet i 2013–2015 og medlem av 17. mai-komiteen i Oslo i 2014–2015.

• Framstegspartiet
• statsråd
• statssekretær
• Justisdepartementet