Hopp til innhold
X
Innhald

Ulukkesdagane 8. og 9. februar 1928

Etter skredet på Skåsheim i 1928. Huset på biletet er butikken som Brita K. Skåsheim dreiv. Foto: Carl Tietz. © Fylkesarkivet.

Etter skredet på Skåsheim i 1928. Huset på biletet er butikken som Brita K. Skåsheim dreiv. Foto: Carl Tietz. © Fylkesarkivet.

Den 8. og 9. februar 1928 kravde to skred på Bruhjell vest for Balestrand i alt fem menneskeliv.

Skåsheimselvi vart demd av snø, og frå kvelden den 8. februar tok det til å gå ras. Folk var redde og gjekk ikkje til sengs. Ut på morgonkvisten den 9. februar gjekk det ei mengd ras i elva som m.a. rudde med seg sommarvillaen til kjøpmann Morten Kielland, Café/Villa Jotunheimen, og eit sagbruk (sjå Truls Olson Bruhjell) og eit tomt bustadhus. Heile huslyden hos Hans og Johannes Johannessen - ekteparet og tre born, omkom i raset.

For å hindre liknande ulukker, vart det i åra etter planta store mengder grantre langs elva.

Den 9. februar 1928 gjekk også Blåhelleskreda og øydela mykje jord på garden Sande lengre aust. Her seier segna at den same skreda tok med seg gardshusa på Sande ein gong på 1700-talet medan sorenskrivaren budde på garden (sjå Sorenskrivar- og kapteinsgarden Sande).

Same dagen i 1928 gjorde eit 5-600 meter breitt snøskred store skadar på gardshusa til Eirik Ese, Jens Ese og Hans L. Ese på Ese. Eirik og Hans miste mykje av buskapane sine då skreda knuste fjøsane. Også nokre plasshus strauk med.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 22.03.2011