Aust for Davik ligg den vesle grenda Dombestein. Eit vakkert hus med halvvalma tak står framleis og vitnar om fordums stordom: «Wiesehuset» er frå 1780 og ligg like ovanfor riksvegen på Dombestein.
Les meir om Wiese-folket under:

• Storgarden Gjerde
• Handelsstaden Osmundsvåg
• Handelsstaden Moldøen
• Handelsstaden Rugsund

Ein kjenner til at det var både vanleg handel og sal av brennevin på Dombestein i 1790. I 1838 søkte Jørgen Dombestein om å få drive både landhandel og gjestgiveri på Dombestein, men fekk avslag fordi han også ville ha skjenking av brennevin. Jørgen fekk likevel løyve i 1841, men berre til handel - ikkje brennevin. Då Halvor Bø tok over i 1847, må kommunestyret har vorte meir frisinna, for han fekk også løyve til å drive gjestgiveri med brennevinskjenking.

Frå 1850 var det Johan Chr. Wiese som dreiv handel og gjestgiveri på Dombestein. Her var det også skysstasjon, og Dombestein vart mykje nytta som «mellomlanding» for fiskarar og jektefolk som siglde ut og inn fjorden. Nede ved sjøen låg det to store buder, og framleis kan ein finne att steinkara etter desse sjøhusa.

Andre generasjon Wiese, Peter C. Wiese, flytta i 1893 til Rugsund og overtok det gamle handelssetet der.