Knut K. Kjelkenes landhandel i Svelgen vart starta i 1917 av Knut M. Knutson Kjelkenes.
Han hadde tidlegare drive fiskehandel i Kalvåg. I tillegg dreiv han trandamperi på garden som han og kona Katrine eigde i Vindspollen. Då anleggsarbeidet starta i Svelgen, dreiv han først handel frå ein båt på kaia på Riseøyra før han bygde eigen butikk på den nye industristaden. Sonen Arnfred Kjelkenes tok over butikkdrifta i Svelgen sist på 1940-talet. Sonen til Arnfred, Olav Kjelkenes, tok over butikken i 1958 og dreiv den til huset vart rive i 1962. Butikken vart flytta til nye lokale i Svelgen Samfunnshus og seinare til Granden, og var i drift til 1992.