I ein lun våg på sørsida av Frøya ligg gardane Liset. Den korte vegen til rike fiskefelt gjorde at folket på Liset alt i mellomalderen var kjende som velståande fiskarbønder.

I 1520 vert Sjur på Liset omtala som ein av dei rikaste i Bremanger. Han hadde ein sølformue som tilsvara verdien av 60 kyr. I 1563 kan ein lese at Oluff på Lidsetter (Liset) eigde skip og dreiv frakt av tørrfisk til Bergen.

I 1848 vart eigedomsretten til beite og kastevågar på nokre mindre øyar utanfor Liset delte på gardsbruka på Liset. Avtalen vart berre gjort munnleg, og då det vart gjort eit stort sildekast ved Litle-Kobbeskjeret i 1904 vart det strid om retten til å krevje inn den store landsluten. Saka gjekk heilt til Høgsterett utan at dei som kravde å få dele landsluten vann fram.