Hopp til innhold
X
Innhald

Hans Holmøy

 Hans Holmøy. Foto: Fylkesarkivet

Hans Holmøy. Foto: Fylkesarkivet

Hans Holmøy (1831-1910), starta i 1858 landets første snikkarskule for gutar – seinare Holmøy Arbeidsskule. Skulen fekk straks etter statsstøtte. Både Hans og broren Oliver var kjende som dugande handverkarar. Hans hadde m.a. ansvaret for snikkararbeidet på nye kyrkjer i Hornindal og Sunnylven, og det var etter oppmoding frå andre bygdefolk at Hans starta arbeidsskulen på heimegarden. Hans Holmøy dyrka farsgarden til eit mønsterbruk der elevane fekk opplæring i gardsdrift. På garden bygde Hans eige skulehus i 1865. Han dreiv skulen fram til sonen Ola H. Holmøy tok over i 1884.

Sentral i kommunedeling

Hans Holmøy stod sentralt i arbeidet for å få skilt ut Hornindal som eigen kommune frå Eid i 1867, og fekk sjølv mange viktige ombod i den nye kommunen. Han var ein sterk talsmann for at det skulle byggjast veg langs sørsida av Hornindalsvatnet.

Angripen av slagbjørn

I 1852 vart Hans Holmøy angripen av ein slagbjørn i utmarka, men berga seg ved å halde fast om tungerota på bjørnen, til broren fekk skote udyret. Hans kom hardt til skade, men overlevde, og episoden skal ha inspirert Adolph Tidemand til å måle det kjende motivet ”Bjørnejegerens hjemkomst”. Bjørneskallen er teken vare på i gardsmusèet.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 27.01.2011