Denne teikninga av Nordfjordeid er datert 1871. Området til venstre for kyrkja er storgarden Myklebust.

Strandstaden Nordfjordeid var i gamal tid dominert av storgardane Myklebust og Gjerde og folket som budde der – særleg av folket på Gjerde. Her ligg framleis det store herskapshuset, løe og husanlegg midt i sentrum av Nordfjordeid slik det gjorde for kring 200 år sidan. Det freda hovudhuset er bygd i 1790 . På Gjerde budde det folk frå rike slekter som har prega mykje av handel og utvikling i Nordfjord heilt fram til 1900-talet.

Myklebust - den eldste storgarden

I dei eldste tider var Myklebust ein av dei største gardane i fylket. Nokre av dei rikaste fornfunn som er gjort på Vestlandet, vart gjorde på den tidlegare storgarden på 1840-talet.

Storgarden Gjerde

Storgarden Gjerde omfatta langt fram på 1900-talet dei mest sentrale områda frå Eidsfjorden og austover dalen mot Langeland. Ingen storgard i Nordfjord har gjennom eigarskap og andre tilhøve vorte så sterkt knytt til kjende handels- og embetsslekter elles i fylket som nettopp Gjerde.

Garden Osnes var eksersisplass

Garden Osnes, som ligg på Nordsida av Eidselva frå elvemunningen og austover, vart kjøpt som sjefsgard i 1792.