Hopp til innhold
X
Innhald

Kystmuseet i Sogn og Fjordane

Kystmuseet. Foto: Ottar Starheim, NRK.

Kystmuseet. Foto: Ottar Starheim, NRK.

Kystmuseet i Sogn og Fjordane vart skipa i 1980 og fekk eige bygg i Florø i 1985. Dei særprega bygningane er teikna av arkitektane Kåre Frølich og Svein Hatløy i Bergen.
Museet forvaltar m.a. ei samling på kring 50 båtar.

Heilt frå 1950-talet har det vore arbeidd aktivt for å få reist eit fiskeri- og kystmuseum i Florø. Seint på 1970-talet regulerte kommunen eit strandområde på 74 dekar som kystmuseet vart bygd på. Bak museet står fylkeskommunen, kystkommunane og ei rad fiskarorganisasjonar og andre lag. Sunnfjord Høgeskulelag (sjå Fiskarfagskulen i Florø) var mellom skiparane, og skaut pengar frå sal av Høgskuleheimen i Florø inn i museet.

Ein del av båtsamlinga på Kystmuseet. Foto: Ottar Starheim, NRK.

Ein del av båtsamlinga på Kystmuseet. Foto: Ottar Starheim, NRK.

Samlinga spreidd på fleire kommunar

I tillegg til store samlingar i hovudanlegget i Florø, har Kystmuseet ansvaret for m.a. bygningar og samlingar i Kalvåg (sjå Fiskarfagskulen i Florø) og på Handelsstaden Vågsberget.

MS Atløy. Foto: Cosmin Cosma, NRK.

MS Atløy. Foto: Cosmin Cosma, NRK.

Galeasen Svanhild. Foto: Ottar Starheim, NRK.

Galeasen Svanhild. Foto: Ottar Starheim, NRK.

Fartøyvern

Museet er også m.a. knytt til vern av galeasen «Svanhild» frå 1889, som var på jordomsegling 1985-1989 med Oddbjørn Hovland som skipper, sognejekta «Svømmianna», fiskebåten «Helgaskjær» frå 1917 og den tidlegare Fylkesbaaten «Atløy» frå 1932.

(Om båtmuseum – sjå også Gloppen kommune (Holvikejekta), Sogndal kommune (Sognefjord båtmuseum) og Vik kommune (båtmotormuseum). I 2007 gav biletkunstaren Bjørn Hegranes eigedomen Jotunet ved Storåsen i Florø til Kystmuséet. Gåva omfatta fleire antikke bygningar og ei stor samling måleri og grafikk.

Galeasen Svanhild på Florevika under jonsokfeiringa 2010. Foto: Ole Ramshus Sælthun, NRK.

Galeasen Svanhild på Florevika under jonsokfeiringa 2010. Foto: Ole Ramshus Sælthun, NRK.

Samordning av muséa i fylket

I 2008-2009 vart det gjennomført ei samordning av muséa De Heibergske Samlinger/Sogn Folkemuséum (Kaupangerskogen), Norsk Reiselivsmuséum (Balestrand), Sunnfjord Folkemuséum (Førde), Sogn og Fjordane Kunstmuséum, Kystmuséet (Florø) og Nordfjord Folkemuséum (Sandane). Dei samordna muséa får felles leiing og har fått namnet Muséa i Sogn og Fjordane. Tanken er at samordninga skal styrke det faglege miljøet, og det vert felles innsamlingspolitikk og felles magasin. Anne-Marie Førde vart tilsett som den første direktøren for Musea i Sogn og Fjordane.

Snorre-ankeret ved Kystmuseet fortel om oljehistoria til Sogn og Fjordane. Foto: Ottar Starheim, NRK.

Snorre-ankeret ved Kystmuseet fortel om oljehistoria til Sogn og Fjordane. Foto: Ottar Starheim, NRK.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 30.06.2010