Hopp til innhold
X
Innhald

MTB-tragedien i Florø 1943

Den norske MTB-en som grunnstøytte på Florevika, fotografert av tyskarane.

Den norske MTB-en som grunnstøytte på Florevika, fotografert av tyskarane.

Dei nordlegaste øyane i Flora, Batalden og Hovden, var nokre av dei viktigaste landingsplassane for norske ubåtjagarar og MTB-ar som opererte langs norskekysten under 2. verdskrig.

I Batalden låg m.a. eit stort bensinlager der krigsskipa bunkra før dei drog vestover att. Tyskarane hadde sine mistankar om lageret; var stadig på leiting, men fann det aldri.

Den 14. mars 1943 dundra ein norsk motortorpedobåt på eit skjer ved Florevika. Saman med ein annan MTB hadde den nett senka eit tysk transportskip på hamna. MTB-en kom seg ikkje av skjeret, og tyskarane gjorde ein etterretningsmessig storfangst. Mannskapet berga seg om bord i den andre båten og stakk til havs. Men den engelsk-bygde MTB-en på skjeret vart ført til Bergen og saumfaren av militære ekspertar.

Grunnstøytinga enda tragisk for to menn frå Flora: Om bord fann tyskarane namnet til Jens Buarøy og Hilmar Hansen skrivne på to vekeblad. Grunnen til dette var at båtane hadde lege nokre dagar kamuflerte ute i øyane før dei slo til, og her hadde mannskapet hatt kontakt med lokale folk. Jens Buarøy vart arrestert saman med den 13 år gamle sonen Alf. Begge vart forhøyrde og torturerte ombord i den berykta svarte Gestaposkøyta.

Ungguten vart etter ei stund sett fri, men faren Jens og Hilmar Hansen frå Florø vart sende til tyske konsentrasjonsleirar, der begge døydde i 1944.

Les meir om krigshistoria i Flora.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 09.06.2010