Hopp til innhold
X
Innhald

Radio- og TV-sendarar i Sogn og Fjordane

I september 2007 vart ei ny, 130 meter høg tv-mast montert på Hafstadfjellet. Foto: Cosmin Cosma, NRK.

I september 2007 vart ei ny, 130 meter høg tv-mast montert på Hafstadfjellet. Foto: Cosmin Cosma, NRK.

Hovudsendaren for radio og fjernsyn på Hafstadfjellet vart bygd i 1958.

Dette var ein av i alt fem hovudsendarar for radio og fjernsyn som vart bygd kringom i Sogn og Fjordane frå midten av 1950-talet og fram på 1960-talet: Gulensendaren på Brosviksåta, Bremangersendaren på Steinfjellet (638 m.o.h.), Nordfjordeidsendaren på Sagtennene (1055 m.o.h.), Førdesendaren på Hafstadfjellet (706 m.o.h.) og Sogndalsendaren på Storehogen (1173 m.o.h.).

Tøft reparasjonsarbeid

Særleg før det vart bygd veg opp til fjelltoppstasjonane var det ein tøff jobb for telemannskapa å ta seg opp til sendarane for å reparere dei når uveret sette dei ut av drift. For å navigere seg fram i dei verste snøstormane brukte vedlikehaldsfolka å gå rett under kraftlina som leverte straum opp til fjellstasjonen. Miste karane synet av kraftlina var dei ille ute. Ved telestasjonane i Måløy, Nordfjordeid, Førde, Gulen og Sogndal var det stasjonert spesialutdanna vedlikehaldsmannskap som hadde ansvaret for drift og vedlikehald av dei store radio- og TV-stasjonane på fjelltoppane.

Nytt, digitalt bakkenett

Eit nytt,digitalt bakkenett for fjernsyn vart teke i bruk over det meste av Sogn og Fjordane i 2007. Nettet er bygd ut av selskapet NTV – Norges Televisjon AS. Dette nettet dekkjer 95 prosent av sjåarane i fylket og gjev høve til mottak av over 20 fjernsynskanalar og 15 radiokanalar. NTV er eigd med like delar av NRK AS, TV2 Gruppen AS og Telenor Holding AS.

Vegen opp til sendaren på Hafstadfjellet er ein mykje brukt turveg for folk i Førde. Foto: Kjell Arvid Stølen, NRK.

Vegen opp til sendaren på Hafstadfjellet er ein mykje brukt turveg for folk i Førde. Foto: Kjell Arvid Stølen, NRK.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 24.11.2010