Hopp til innhold
X
Innhald

Anders Fannemel

Anders Fannemel. Foto: Jon-Michael Josefsen.

Anders Fannemel. Foto: Jon-Michael Josefsen.

Anders Fannemel fødd 1991, frå Hornindal. Skihoppar. Han debuterte i verdscupen i desember 2009 og vart då nummer ti. I 2010 vart han nummer 11 i junior-VM, og han vart norsk juniormeister same året.

I 2011 var han med på å ta bronse i lagkonkurransen i junior-VM i Estland. I den individuelle konkurransen vart han nummer fire.

I sommar-Grand Prix i 2011 fekk han sitt internasjonale gjennombrot med sin første pallplass på seniornivå då han vart nummer tre og beste nordmann i Almaty i Kazakhstan. Han tok og ein fjerde- og ein sjuandeplass i sommar-Grand Prix-renna i Japan.

Historiske NM-medaljar

I januar 2012 kom Fannemel på sjuandeplass i eit verdscuprenn i Sapporo i Japan, og i februar same året var han med på det norske laget som gjekk til topps i laghopp i verdscuprennet i Willingen. Samanlagt vart han nummer 25 i verdscupen 2012. I 2012 tok han og bronsemedalje i senior-NM stor bakke og sølvmedalje i normalbakke. Dette er dei første NM-medaljane nokon skihoppar frå Sogn og Fjordane har teke i seniorsamanheng.

Anders Fannemel i Engelberg i Sveits 14. desmeber 2012. Foto: Sigi Tischler, Ap.

Anders Fannemel i Engelberg i Sveits 14. desmeber 2012. Foto: Sigi Tischler, Ap.

244,5 meter

Same året vart han teken ut på VM-laget i skiflyging. Han vart nummer 13 i den individuelle konkurransen og hadde det lengste hoppet i konkurransen med 244,5 meter. Dette var det til då nest lengste skihoppet i verda. I lagkonkurransen var han med på det norske laget som tok fjerdeplass.

Framfor sesongen 2012/13 vart Anders Fannemel teken ut på det norske verdscuplaget.

I 2012 vart han kåra til årets skiflygar av den internasjonale skiflygarorganisasjonen KOP (KOP Man of the Year).

Norsk meister og pallplass i verdscupen

I sesongen 2012/2013 vart han i november 2012 norsk meister i stor bakke på Rena, og han tok sølv i liten bakke. Same månaden tok han sin første pallplassering i verdscupen då han vart nummer to i stor bakke på Lillehammer.

Han vart og teken ut på det norske laget i den tysk/austerrikske hoppveka 2012/2013. Der vart han nummer 18 samanlagt. Fannemel er den andre frå Sogn og Fjordane som har delteke i denne prestisjefylte turneringa, den første var Rune Hauge.

I sesongen 2013/2014 tok han ein fjerdeplass (Garmisch-Partenkirkchen) og ein sjuandeplass (Bischofshofen) i den tysk-austerrikske hoppveka. Han vart teken ut i den norske troppen til OL i Sotsji. Han tok sølvmedalje i NM stor bakke på Lillehammer i januar 2014.

I OL vart han nummer fem i storbakken og nummer 15 i normalbakken. Han var og med på lagkonkurransen, der Norge vart nummer seks.

Første verdscupsigeren

I sesongen 2014/2015 tok han sin første verdscupsiger. Det skjedde i Nizjnij Tagil i Russland i desember. Han var beste nordmann i verdscuprenna før jul og kom på andreplass både på Lillehammer og i Nizjnij Tagil. I NM stor bakke 2015 tok han sølvmedalje. I februar gjekk han igjen heilt til topps i eit verdscuprenn – i Titisee-Neustadt i Tyskland.

Verdsrekord og VM-gull

Under verdscuprenna i skiflyging i Vikersund i 2015 sette han den 15. februar ny verdsrekord med 251,5 meter og sikra seg to andreplassar i renna. Under VM i Falun var han med på det norske laget som tok gullmedalje i laghopping. Individuelt vart han nummer sju i stor bakke og nummer ni i liten bakke. I verdscupen 2014/2015 vart han nummer fire samanlagt. I 2015 vart han utnemnd til æresmedlem i Hornindal Idrettslag.

VM-gull i skiflyging

I januar 2016 vart det ein ny VM-tittel. Fannemel var med på å vinne gull i VM for lag i skiflyging i Kulm i Austerrike. Individuelt vart han nummer sju. Under VM i Lahti i 2017 var Fannemel med på det norske laget som tok sølvmedale i laghopping.

Anders Fannemel under VM i skiflyging i Vikersund i 2012. Foto: Rune Fossum, NRK.

Anders Fannemel under VM i skiflyging i Vikersund i 2012. Foto: Rune Fossum, NRK.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 13.03.2017