Hopp til innhold
X
Innhald

Huldresølvet i Kjelsnesa

Ei av dei mest kjende segnene i Jølster er segna om Huldresølvet.

Segna lyder slik:

Ei jente i Kjelsneset på sørsida av Jølstravatnet brukte å ta hunden med når ho gjekk til stølen for å mjølke. Ein kveld kom hunden heim åleine, gøydde og var i ulag. Han stirde gardsdrengen opp i auga og freista lokka han med seg opp bakkane. Oppe ved stølen, såg drengen sju blå hestar på setervollen. Guten kleiv opp på stølstaket og glytta ned ljoren. Nede i stova fekk han auge på kjærasten sin:

Der sat ho pynta som brur av huldrefolket, som dansa omkring henne. Men guten visste råd. Han løyste slirekniven og kasta den ned i fanget på jenta. Huldrefolket skvatt til alle kantar, og var borte på ein blunk. Men brura sat att i brurestasen, og slik bar det til at Huldresølvet kom til Kjelsnes, der det framleis er i familien si eige.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 02.01.2011