Hopp til innhold
X
Innhald

Leigefriaren

Illustrasjonsfoto: Colourbox.no

Illustrasjonsfoto: Colourbox.no

I gamle dagar var det ikkje uvanleg at menn opererte med ein «leigefriar» som vart send til den utvalde med spørsmålet. Slike vart kalla omtalsmenn.

På Ålhus hadde bonde og ordførar Anders Emmanuel Ålhus sett seg ut den 16 år gamle og velståande jordajenta Katarina Danielsdatter Befring i Stardalen som koneemne. Han allierte seg med lærar Ludvig G. Åsen, som reiste til Stardalen som omtalsmann. Men då jenta fekk spørsmålet, svara Katarina:

- Hadde du spurt for deg sjølv, så. Det gjorde Ludvig, og fekk «ja» på flekken!

Faren til jenta vart kvit av sinne då han høyrde kva som hadde hendt. Han truga med å gjere henne arvelaus, og freista presse Katarina til å gå frå lovnaden om giftarmål med Ludvig. Men då rømde ho frå garden. Ludvig måtte til slutt betale den vrange svigerfaren 10 dalar for å sleppe at han nekta dei lysing. Men seinare vart svigerson og svigerfar vel forlikte, og det enda med at Daniel kjøpte gard til svigersonen.

Denne artikkelen er ein lokalhistorisk artikkel frå Fylkesleksikon for Sogn og Fjordane. Den er ikkje vurdert som leksikalsk innhald. Ver varsam med å nytte artikkelen som kjelde. 

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 11.09.2018