Martin Huslid

Martin Johannes Huslid var fødd i Vik i Sogn i Sogn og Fjordane (no Vestland) og døydde i Brussel i Belgia. Han voks opp på Skei i Jølster i Sunnfjord. Etter examen artium ved Firda landsgymnas i 1950 tok han siviløkonomeksamen ved Noregs handelshøgskole i 1957 og byrja året etter i utanrikstenesta.

Han vart byråsjef i Utanriksdepartementet i 1970, ekspedisjonssjef i 1975 og spesialrådgivar i 1978. I perioden 1982–1990 var han ambassadør ved EFTA og FN-kontora i Genève, i 1990–1994 ambassadør ved FN i New York, og i 1995–1996 ambassadør i Brussel.

Dei første åra i utanrikstenesta gjorde han teneste ved den faste delegasjon i Genève og ved ambassaden i Brussel. Seinare tok han del i forhandlingane om norsk medlemsskap i Fellesmarknaden, fram til folkerøystinga i 1972. I 1978 vart han hovudforhandlar for ei ny økonomisk verdsordning (NØV), som skulle gi utviklingslanda betre handelsvilkår.

Både i Genève i 1880-åra og som ambassadør ved FN i New York vart han utpeikt til formann for fleire FN-organ, særleg når det galdt utviklingsspørsmål.

Huslid vart i 1987 utnemnd til kommandør av St. Olavs Orden.

• Martin Huslid i Norsk biografisk leksikon
• utanrikstenesta
• diplomati
• FN

• «Ambassadøren frå Jølster», Jølst. Jølster Mållag 1988
• Bjarne Lindstrøm: «Martin Huslid», minneord, Aftenposten 21.2.1996
• Rolf Tamnes: Oljealder. 1965–1995, i Norsk utenrikspolitikks historie, bd. 6. Oslo 1997