Apneseth er fødd 23. januar 1955 i Florø. Han tok artium i 1974 og har elles utdanning frå Akademiet i Rauland og Mo jordbruksskule, og grunnfag i lokalhistorie ved Universitetet i Bergen. Frå 1979 til 1987 arbeidde han som frilansar. Sidan 1987 har han vore tilsett som pressefotograf i Bergens Tidende. Han har dessutan illustrert fleire bøker og mellom anna vore festspelfotograf for Festspillene i Bergen. Apneseth er busett i Jølster.

 

Apneseth har illustrert bøker av forfattaren Frode Grytten – romanen Bikubesong (1999) og reiseskildringa Dublin (2002). Bileta hans finn vi òg i fleire bøker om kunstnarar – Ludvig Eikaas i Eikaas i 80 (2000) og Oddvar Torsheim i Tvisynt tvilar (2001). Den sistnemnde vann prisen som Årets vakraste bok 2002. I boka Herifrå (2006), som Apneseth gav ut saman med journalisten Katrine Sele, har han utforska daglegliv og identitet i Sogn og Fjordane, med særleg vekt på å få fram særeigne historier som sjeldan vert fortalde.

 

Apneseth har fleire gonger reist som fotograf i krigs- og katastroferåka delar av verda. I 1994 vann han prisen Årets bilete for «Mentalsykehuset i Tuzla» (Bosnia) og i 2005 for «Etter jordskjelvet» (Pakistan).

 

Presse 1997

 

«Årets bilde 2005 til Oddleiv Apneseth», fotojournalisten.com

Omtale av Oddleiv Apneseth på heimesida til Skald forlag

Først publisert: 30.06.2009
Sist oppdatert: 12.04.2012