Hopp til innhold
X
Innhald

Svein Lundevall

Svein Lundevall fødd 1944 i Oslo, oppvaksen i Leikanger og Førde, busett m.a. i Leikanger og Olden. Statsvitar og fylkesrådmann. Cand. polit. frå UiO i 1971. Har elles m.a. eitt års økonomistudium ved Universitet i Lund, Sverige, studiar i internasjonal administrasjon i Geneve 1968 og Statens Forvaltningshøgskule 1984.

Arbeidde frå 1971 til 1977 i Finansdepartementet, dei siste åra som byråsjef. Frå 1977 til 1997 fylkesrådmann i Sogn og Fjordane. I studietida var han m.a. medlem i landsstyret i Norges Konservative Studentforbund og formann i Studentmållaget i Oslo 1968-1971. Medlem i styret for Noregs Ungdomslag 1976-1977.

I tida som fylkesrådmann gjorde Lundevall i samarbeid med Bjørn Tønnesen ved Høgskulen i SF opptaket til skiping av Vestlandsforsking i 1985 og var styreleiar der i fem år. Stod sentral i arbeidet med reorganisering av Kommunedata Vestlandet (KDV) i 1987, m.a. med skiping av avdeling på Leikanger med 25 tilsette.

Har elles m.a. vore medlem av Naturskadelovutvalet 1972-1974, styremedlem i Norsk Institutt for By- og Regionforsking (NIBR), medlem av Nordisk budsjettutval 1974-1977, leiar i fylkesrådmennene sitt arbeidsutval i KS 1986-1987 og medlem av utgreiingsgruppa i Samarbeidsrådet for Vestlandet og Sørlandet.

Han gav i 1999 ut boka «Framover, men...» (Skald Forlag) om Sogn og Fjordane fylkeskommune, med erindringar og analysar av tida som fylkesrådmann.

Lundevall vart vald til første leiar i den nyskipa Sogn og Fjordane parkinsonforening frå 2007.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 03.08.2011