Hopp til innhold
X
Innhald

Lensmannen blotta seg i gravøl

I gamle dagar kunne det rett som det var hende at også øvrigheita tedde seg «utagerande» når dei fekk for mykje god øl i kroppen. Slik gjekk det også med Jostedals-lensmannen Lars Snetun ein gong på 1700-talet.

Han var nok ein villstyrig kar, for støtt kom han i krangel med den strenge presten i bygda. Det enda med at presten fekk futen til å reise sak mot Lars, som m.a. vart skulda for å ha selt ulovleg brennevin. Dessutan skulle lensmannen ha sett mellom fingrane på at folk bryggja dugleg meir øl enn den fastsette kvoten når dei skulle feire bryllup.

Men den hardaste skuldinga var at lensmann Lars ei eit våtsamt gravøl (gravferd) skulle ha sleppt ned broka og vist fram heile stasen! Men då futen skulle døme, fann han ingenting i lova som kunne straffe lensmann Lars fordi han hadde vist fram «røvi» i gravøl. Slik slapp han fri dei hardaste skuldingane som presten hadde sett fram. Heile saka enda med at Jostedals-lensmannen fekk tre riksdalar i bot.

Medan presten som melde han, måtte bite i seg å få refs frå futen fordi han hadde lagt Jostedals-lensmannen for hat.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til post(a)allkunne.no.


Sist oppdatert: 17.11.2008