Hopp til innhold
X
Innhald

Udyr i Naustdal-marka

Dei aude fjellviddene mellom Hyen, Gloppen og Naustdal har all tid vore rike på vilt.

Dei aude fjellviddene mellom Hyen, Gloppen og Naustdal har all tid vore rike på vilt.

På slutten av 1850-talet gjorde bønder i Gjengedal i Hyen eit mislukka forsøk på tamreindrift. Men reindrifta gjorde at rovdyrbestanden i fjellområdet auka sterkt, og bjørn herja stygt i husdyrflokkane.

I 1890-åra vart det felt ein slagbjørn i Endestad-marka. Bjørnen hadde gøymt seg i eit hi, men vart røykt ut. Første skotet såra bjørnen, som gjekk til åtak på næraste mann.

Til slutt lukkast det å få inn eit drepande skot. Daniel Fimland (1871–1968) skaut den siste bjørnen i Naustdal ca. 1900.

Siste ulven

Ola Andersson som var husmann under garden Tingnes i Vevring, skal i fylgje bygdeboka vere den siste som skaut ulv i den delen av kommunen. Ola levde mellom 1751 og 1811. Ulven vart oppdaga ei månelys natt. Ola treiv børsa og sprang etter ulven berre i undertøyet. Han fylgde etter dyret heilt inn til gryta før han fekk skot på ulven og såra han. Dyret vart seinare funne daudt i fjella ved Redalen.

Tente gode pengar på jakt

Ingvald A. Herstad (1825-1900) frå Herstad var kjend som ein svært ivrig fangstmann. I Skoraurane hadde han set opp ei mengd murte steinfeller der han fanga rev og mår. Det vert fortalt at det var ingen der i grenda som hadde så mykje pengar mellom hendene som Ingvald etter at han hadde vore til Bergen om vårane og selt pelsskinna.

Les også om: Den utrulege Naustdals-ulven

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 22.12.2009