Hopp til innhold
X
Innhald

Hans Gullak Dahl Faleide

Gravstaden til familien Faleide ved Stedje kyrkje. Foto: Kjell Arvid Stølen, NRK.

Gravstaden til familien Faleide ved Stedje kyrkje. Foto: Kjell Arvid Stølen, NRK.

Hans Gullak Dahl Faleide (1914-1946) frå Sogndal. Prisinspektør og motstandsmann under 2. verdskrig. Faleide arbeidde i den sivile forsyningstenesta under 2. verdskrig og kunne såleis reise temmeleg fritt kringom i Sogn og Fjordane. Han dreiv truleg med etterretningsarbeid saman med XU-leiaren i fylket, Agnar Ulvedal.

Faleide vart arrestert og overført Espeland 17.9.1943, og sleppt fri 1.11.1943.

Vinteren 1944-1945 kom han med i Milorg i Sogn og Fjordane. I Milorg fungerte han som kurér mellom dei ulike motstandsgruppene i Sogn og i Nordfjord. I den store opprullinga av Milorg i Sogn og Fjordane på etterjulsvinteren 1945 vart nøkkelpersonen Hans Faleide arrestert av Gestapo den 10. januar og overført til Bergen.

Ein månad seinare vart han overførd til fangeleiren Espeland. Hans Faleide vart svært grovt torturert av Gestapo. Han vart så ille medfaren at han døydde kort tid etter freden.

Også broren Edvard Johan Michelsen Faleide var motstandsmann og lei same lagnad med torturskadar som han seinare døydde av. Faren til brørne var lensmann Andreas Faleide i Sogndal.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 17.08.2011