Hopp til innhold
X
Innhald

Agnar Ulvedal

XU-leiar

Agnar Ulvedal (1915-1998) frå Ulvedal i Stryn, busett i Leikanger, Oslo og Innvik. Politimann og motstandsmann under andre verdskrig. Ulvedal vart engasjert i Bergen kommunale Veddrift under andre verdskrig. Dette gav han stor fridom til å reise over heile Sogn og Fjordane, m.a. for å organisere vedhogsten.

XU-leiar

Ulevedal vart i 1942 engasjert som leiar i Sogn og Fjordane for den topphemmelege allierte etterretningsorganisasjonen XU, og greidde m.a. å få ut verdfulle opplysningar om tyskarane sine festningsanlegg på kysten. Jomar Lie frå Leikanger var nestleiar. Andre sentrale XU-folk var brørne Olav K. Henden frå Sandane og Rolv Henden frå Førde.

Politi i Oslo

Etter krigen var Ulvedal med på å starte Moelven-fabrikken i Utvik, før han reiste til Oslo og vart politimann. Her var han i mange år fram til 1978 politisjef ved Manglerud politistasjon. Deretter var han tryggingssjef i Andresens Bank i to år.

Redaktør

Ulvedal var sterkt engasjert i arbeidet i Politiidrettsforbundet, og var i over 25 år redaktør for årsskriftet «Norsk krimiminalkrønike». Som pensjonist busette han seg i Innvik. Han omkom i ei trafikkulukke ved Strynevatnet i mai 1998.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 08.03.2011