Hopp til innhold
X
Innhald

Frikyrkje og Frelsesarmé

Frelsestempelet i Vik. Foto: Ottar Starheim, NRK.

Frelsestempelet i Vik. Foto: Ottar Starheim, NRK.

Den første kjende frikyrkjelyden i Sogn og Fjordane vart skipa i Vik av metodistpresten Sjur Ulness.

Sjur heitte opphaveleg Ølnes og kom frå Sogndal, men hadde vore ein tur i Amerika, og skreiv difor om etternamnet til Ulness. Då han vende tilbake til Noreg ca. 1890, bygde han først frikyrkje-huset «Sion» i Sogndal i 1893. Dette var det første «frikyrkjehuset» i fylket. I 1892 starta han bladet «Ildtungen», som i 1900 skifta namn til «Sandhed og frihed» og gjekk til 1916.

Ulness slo seg ned i Vik i 1893, der han skipa ”Vikørens frie evangeliske menighed” og bygde kyrkja "Ebenezer" i 1895.Han gjekk seinare over til baptistane (nydøyparane), og hadde i 1910 35 medlemer i kyrkjelyden sin.

Bernhard Olsen (til høgre) og sonen Alfred i frelsesarméuniformer. Ukjend fotograf. Eigar: Vik lokalhistoriske arkiv.

Bernhard Olsen (til høgre) og sonen Alfred i frelsesarméuniformer. Ukjend fotograf. Eigar: Vik lokalhistoriske arkiv.

Ulness vart ein leiande mann innan frikyrkja i Noreg, og gav ut fleire kyrkjelydsblad. I Vik skapte den spesielle og karismatiske mannen mykje uro og strid i kristenlivet i den tida han budde i bygda. Det vekte m.a. åtgaum at dei praktiserte vaksendåp i sjøen ved naustrekkja på Vikøyri.

Då Ulness flytta til Oslo i 1913, leigde Frelsesarméen huset deira i Vik og starta verksemd i bygda. Utanom Vik er det berre i Florø og Måløy at Frelsesarmeen har hatt faste lokale i Sogn og Fjordane. Frå Vik opererte dei fire soldatane frå Leikanger og vestover. I 1938 kjøpte Frelsesarmeen huset etter frikyrkja, og i 1963 flytta dei inn i «Frelsestempelet» på Vikøyri.

Juniorsoldatar i Frelsesarmeen rundt 1950. Framme frå venstre: Hjørdis Svendsen, Kristin Svendsen, Gunvor Johnsen, Edith Lilleøren og Tordis Vårland. Bak: Gjertrud Grov, Reidar Fedje, Guttorm Christensen, Magnar Svendsen og Margit Atterås. Bak til venstre står kaptein Gerda Terjesen og til høgre løytnant Fredhøy. Foto frå Pridlao. Ukjend fotograf. Eigar: Marie Christensen/Vik lokalhistoriske arkiv.

Juniorsoldatar i Frelsesarmeen rundt 1950. Framme frå venstre: Hjørdis Svendsen, Kristin Svendsen, Gunvor Johnsen, Edith Lilleøren og Tordis Vårland. Bak: Gjertrud Grov, Reidar Fedje, Guttorm Christensen, Magnar Svendsen og Margit Atterås. Bak til venstre står kaptein Gerda Terjesen og til høgre løytnant Fredhøy. Foto frå Pridlao. Ukjend fotograf. Eigar: Marie Christensen/Vik lokalhistoriske arkiv.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 20.07.2011