Hopp til innhold
X
Innhald

Johs. Hove AS

Johannes og kona Sittona på trappa utanfor butikken. Foto: Vik lokalhistoriske arkiv.

Johannes og kona Sittona på trappa utanfor butikken. Foto: Vik lokalhistoriske arkiv.

Johs. Hove AS landhandel vart starta i Vik i 1920 av Johannes Hove (1887-1960). Forretninga vart aksjeselskap i 1931. Forretninga dreiv m.a. elektrisk installasjon og sal av radioapparat. Johannes var sjølv installatør, og hadde lært seg faget i samband med monteringa av første kraftstasjonen i Vik i 1913.

Johannes Hove bygde i 1930 eit etter måten stort forretningsbygg på Vikøyri på ei tomt som han kjøpte frå Hopstock Hotell. Her dreiv både Hove og hotelleigaren Mons Thorsen (med firma M. & Th. Thorsen) kvar sin landhandel i første høgda. Butikken til Johnsen vart på folkemunne kalla «Johanneskyrkja» på grunn av den spesielle innreiinga med bogar og kvelvingar. Også postkontoret heldt til her 1930-1959.

Forretningsbygget Hove reiste i 1930. Foto: Ottar Starheim, NRK.

Forretningsbygget Hove reiste i 1930. Foto: Ottar Starheim, NRK.

Kafé og folkebad

I andre høgda dreiv Hove «Gimle Herbyrge og Kafe». Kafeen vart driven til 1960. I kjellaren bygde Hove «Vik Folkebad -Karbad og Styrt», der det kosta ei krone å få lauga seg (sjå elles om tilsvarande «folkebad» på Byrkjelo og i Førde - Badehuset ved Langebrua).

Hove-bygget har elles gjennom tida også husa tannlegekontor, frisør, fargehandel, blomsterbutikk, innreiingsbutikk og TV-forretningar. Forretninga Johs. Hove AS vart overteken av slektningen Reidar Hove og avvikla i 1995.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 09.06.2011