Hopp til innhold
X
Innhald

Peter Andreas Blix

Foto © Fylkesarkivet.

Foto © Fylkesarkivet.

Peter Andreas Blix (1831-1901) frå Stavern, busett i Vik. Ingeniør, arkitekt og kyrkjebergar.

Studerte 1850-1855 ingeniørfag og arkitektur i Tyskland. Tilsett i Kanalvesenet (forløparen til NVE) 1855-1863. Tilsett ved byingeniørkontoret i Bergen 1863-1868. Her teikna han m.a. brannstasjonen i Bergen. Dreiv privat arkitektfirma frå 1868 til 1873, då han vart tilsett som arkitekt og ingeniør i NSB fram til 1878. I denne perioden teikna han mange stasjonsbygningar.

Han teikna også fleire norske hotell, m.a. Mundal Hotell i Fjærland og Fleischers Hotell på Voss. I 1871 skipa Blix vestlandsavdelinga av Foreningen for Norske Fortidsminnesmerkers Bevaring. Denne omfatta Sogn og Fjordane fram til 1983, då det vart skipa eiga fylkesavdeling.

Blix kjøpte Hopperstad stavkyrkje. Foto: Ottar Starheim, NRK.

Blix kjøpte Hopperstad stavkyrkje. Foto: Ottar Starheim, NRK.

Restaurering

I 1879 vart Blix medarbeidar til Eilert Chr. Bordtkorb Christie ved restaureringa av Håkonshallen og Mariakirken i Bergen. For å skaffe høveleg byggjestein til restaureringa, vart det lyst i avisene.

Eitt av svara kom frå Vik, der restane etter middelalderkyrkja på Hove var til sals. Blix reiste i 1880 til Vik, men i staden for å frakte steinen til Bergen, kjøpte han Hove kyrkje og restaurerte den for eigne midlar. Sidan gjorde han det same med den falleferdige stavkyrkja på Hopperstad.

Blix er gravlagd i Hove steinkyrkje. Foto: Arild Nybø, NRK.

Blix er gravlagd i Hove steinkyrkje. Foto: Arild Nybø, NRK.

Sjå også:

Eigen stil

Begge restaureringsarbeida er sterkt prega av synet som Blix hadde for korleis slikt arbeid skulle utførast: I Hove-kyrkja er nymåla veggdekorasjonar og takkonstruksjon prega av den rådande «historiestilen» seint på 1800-talet, og Hopperstad-kyrkja er utvendes gjort til ein kopi av Borgund stavkyrkje, med svalgangar, takryttar og drakehovud i møna - sjå Nasjonalklenodiet Borgund stavkyrkje.

Relieff av Peter Andreas Blix.

Relieff av Peter Andreas Blix.

Budde i Vik

Blix budde dei siste åra av livet fast i Vik. Her hadde han i alle år sitt faste «Blix-rom» på Hopstock Hotell. Han er gravlagd under golvet i Hove-kyrkja.

Minnesmerke

I 1981 vart det reist eit minnesmerke over Peter Andreas Blix ved Hopstock Hotell. Bronserelieffet er laga av Trygve Skilbreid frå Stokke. Idrettshallen i Flatbygdi er også kalla opp etter kyrkjebergaren - «Blixhalli».

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 10.06.2011