Villrein på Vikafjellet. © Sognafoto.

Ein av dei stader der det vart satsa på tamreindrift kring 1840, var på Vikafjellet. Tamreinlaget vart skipa i 1843, og reinen vart henta frå Hardangervidda.

Det lokale tamreinlaget vakta reinen med innleigd gjetar, og ei tid var ein oppe i 700-800 dyr. Men udyr gjorde stor skade, og kring 1874 vart tamreinen driven saman og avliva.

I 1930 vart det på nytt skipa tamreinlag - Vossestrand tamreinslag, der alle som hadde beiterettar i fjella mellom Voss og Vik skulle ha part i flokken. I 1947 bytte laget namn til Voss og Sogn Reinsdyrlag. I 1958 hadde laget 1.150 medlemer. På 1950-talet var flokken komen opp i kring 700 dyr.

Både på Vikafjellet og i Fresvik vart det satsa på tamreindrift. Dette biletet er frå Fresvik ca. 1950, rett før dei sleppte ut 10 kalvar. Foto: Kjerstine Vange. Eigar: Kjerstine Vange/Fylkesarkivet i Sogn og Fjordane.

Konflikt med husdyra

Men på 1950-talet vart det konfliktar. Husdyreigarar på Sogne-sida klaga over at reinen, som gjekk umerka, øydela beita for husdyr. I 1958 enda striden i retten, og reinsdyrlaget vart dømd til å betale ei mindre skadeserstatning.

Tamrein blir villrein

I 1962 vart Reinsdyrlaget oppløyst, og i 1966 vart reinen på Vikafjellet erklært som villrein.

Les også om:

• Tamreindrifta i Lærdal og Borgund
• Tamreindrifta i Årdal