Faktaboks

Amanda Igland

Amanda Grotle Igland

Fødd
12. september 1917, Grotle i Bremanger
Død
14. desember 2002

Amanda Igland var ei norsk fiskarkone, pensjonatvert, politikar og organisasjonskvinne. Ho var ein pioner i arbeidet for den norske fiskarfamilien sine kår og for å ta vare på den norske kystkulturen.

Amanda Igland var fødd på Grotle i Bremanger. Ho voks opp i ein fiskar- og småbrukarfamilie og blei sjølv fiskarkone før ho fylte tjue år. I perioden 1970–1998 dreiv ho saman med ektemannen pensjonatet Havly i Bremanger. Igland gjorde det til si livsgjerning å betre den norske fiskarfamilien sine sosiale og økonomiske kår. Særleg engasjerte ho seg for situasjonen til fiskarkonene, som ho meinte det ikkje blei teke omsyn til i saker og diskusjonar som galdt kystrelaterte spørsmål. Ho arbeidde òg aktivt for å skape interesse for norsk kystkultur.

I 1953 var Igland med på å skipe Noregs Fiskarkvinnelag, der ho var leiar i perioden 1975–1986. Ho var òg leiar i Bremanger Fiskarkvinnelag i heile 22 år (1959–1981) og leiar i kvinneutvalet i Sogn og Fjordane Fiskarkvinnelag (1959–1970). Ei viktig kampsak for Igland var at kvinner skulle få representasjonsrett i landsstyret i Noregs Fiskarlag. Ho kjempa òg for at fiskarar skulle ha rett på ferie, noko som resulterte i Lov om ferie for fiskere i 1972. I tillegg til organisasjonsarbeidet sat Igland i ei rekkje kommunale, fylkeskommunale og nasjonale utval med kystrelaterte oppgåver. Og gjennom fleire år var ho representant i Bremanger kommunestyre og formannskap for partiet Venstre.

Igland var ein samfunnsbyggar, og i 1987 fekk ho Kongens fortjenstmedalje i gull for innsatsen sin. Same året fekk ho òg Kulturprisen i Bremanger kommune.

Les meir i Store norske leksikon

Eksterne lenker

Litteratur

  • Furnes, Kåre: «Fiskarkvinna», 100 år 100 navn. Personer som har preget hundreåret på Nordvestlandet. Sunnmørsposten Forlag 2000
  • Lotherington, Ann Therese og Thomassen, Bente: «Å leva det er å elska». Norges fiskarkvinnelag gjennom 40 år. Tromsø 1993

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg