Edvard Germanus Johannessen var forretningsmann i Bergen, bokmann, nynorskforkjempar og omsetjar. Han omsette mellom anna Goethe, Burns og Shakespeare-sonettar.
Edvard Germanus Johannessen
Faktaboks
Edvard Alme
- Fødd
- 28. mai 1848, Bergen, Vestland
- Død
- 17. juni 1922, Bergen
Bakgrunn
Slekta hans var frå Hafslo i Sogn. Han kom tidleg inn i Sundts manufakturforretning i Bergen og var der heile arbeidslivet, det meste av tida som kontorsjef. Då han slutta i 1916, vart han heidra med riddarkrossen av St. Olavs Orden for allmennyttig verksemd og for innsatsen i firmaet.
Omsetjing
Under pseudonymet Edvard Alme gav han ut fleire omsetjingar: Johann Wolfgang von Goethes Hermann og Dorothea (1903), Fyrste Akten or Kaupmannen i Venezia av William Shakespeare (1905), Ein Flokk Shakespeare-Sonnettor (1918), Byron Kvæde (1920) og «Helsing til ein Diktar-bror» av Robert Burns (1921). Han førebudde utgivinga av Henrik Krohns Skrifter (1909).
Målmann og myrdyrking
Johannessen var med i Vestmannalaget frå det vart skipa i 1868, var formann i 1879–1908 og redigerte Fraa By og Bygd i 1879, den siste årgangen. I eit minneord hevda Johannes Lavik at dei av vestmennene som nådde djupast målkunne, var Georg Grieg og Edvard G. Johannessen.
Johannessen tok initiativ til opparbeidinga av Nordnesparken i Bergen i 1888–1898. I 1918 vart han heidra med ei bronsebyste i parken, utført av Ambrosia Tønnesen.
Han fekk skipa Bergens Myrdyrkingsforening i 1896. Foreininga medverka til bureising og indre kolonisasjon gjennom stønad til oppdyrking av myrar i Hordaland.
Les meir i Store norske leksikon
Litteratur
- Johannes Lavik: «Edv. G. Johannessen», Norsk Aarbok. 1922
- Torleiv Hannaas: «Edv. G. Johannessen», Gula Tidend 15.06.1922
- «Edv. G. Johannessen», Gula Tidend, 28.05.1918
- Olav Vevle: «Menneske eg minnest. Edv. G. Johannessen», Norsk Tidend 24.06.1948
- Hannaas, Clausen, Jerdal: Vestmannalaget i 110 år. Bergen, 1978
- Jostein Krokvik: Henrik Krohn. Vestmannalagsreisaren og målreisaren. Bergen, 2002
- Kristian Smidt (red.): Sonetter av William Shakespeare. Oslo, 1964
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.