Hallgeir Langeland er lærar og tidlegare stortingsrepresentant for Sosialistisk Venstreparti (SV) frå Rogaland frå 1997 til 2013.
Hallgeir Langeland
Faktaboks
Hallgeir Håbekk Langeland
- Fødd
- 14. november 1955, Strand, Rogaland
Bakgrunn
Hallgeir Håbekk Langeland er fødd i Strand i Rogaland. Han gjekk idrettslinja på vidaregåande skule på St. Svithun i 1972–1975, tok sersjantkurs (USK) i Forsvaret i 1975–1976, deretter historie grunnfag i 1978 og lærarutdanning ved Høgskolen i Stavanger (no Universitetet i Stavanger) i 1978–1982. Han arbeidde som lærar ved ulike skular i 1982–1990 og var rådgivar (1990–1996) og undervisningsinspektør ved Austbø ungdomsskole (1996–1997).
Politisk karriere
Langeland var gruppeleiar og medlem av formannskapet i Stavanger bystyre for Sosialistisk Venstreparti i 1991–1995 og medlem av bystyret i 1995–1997. I 1992–1995 var han medlem av styret for Rogaland SV og medlem av sentralstyret til partiet i 1995–1999. Langeland var stortingsrepresentant for Sosialistisk Venstreparti frå Rogaland samanhengande frå 1997 til 2013. Han var medlem av energi- og miljøkomiteen i 1997-2005, transport- og kommunikasjonskomiteen i 2005-2013 og kontroll- og konstitusjonskomiteen i 2009-2013.
Som politikar stod han gjerne i spissen for aksjonar og sivil ulydnad, og har hatt eit særleg internasjonalt engasjement. Han arbeidde for rushtidsavgift i byane, lyntog og kollektivtransport, og han er imot utbygging av gasskraftverk og for alternativ energi. Langeland høyrde til venstrefløya i partiet og har ved fleire høve kritisert si eiga partileiing.
Andre verv
Langeland har hatt fleire administrative verv og tillitsverv, mellom anna har han vore medlem av skulestyret i Strand kommune i 1975–1977, styremedlem i Midtbygdens Idrettslag i 1975–1978, i Norsk Lærarlag i Stavanger og Rogaland i 1986–1991 og i Cubaaksjonen i Stavanger i 1990–1995. Han har òg arbeidd med og for nynorsk i ulike samanhengar og var styremedlem i Løvebakken mållag.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.