Åsne Valland Nordli

Åsne Valland Nordli er fødd i Kvam i Hardanger i Hordaland (no Vestland). Ved sidan av songen har ho òg drive med kyrkjelydsarbeid, og saman med ektemannen utførte ho i perioden 1998–2003 humanitært arbeid for gatebarn og unge prostituerte i Romania.

Valland Nordli er sjølvlært som folkesongar, men fekk tidleg viktige impulsar frå musikarar som Steffen Eide, Margareta Opheim, Sondre Bratland og Nils Økland. Ho byrja å syngje offentleg i tiårsalderen, som 14-åring underviste ho ved Ole Bull Akademiet på Voss, og i 1992 turnerte ho med Bergen Filharmoniske Orkester. Ho tok tidleg til å leite fram religiøse folketonar frå Kvam, og nokre av desse er å høyre på den første plata hennar, Den ljose dagen (1994), som også inneheld eigenkomponert stoff.

Seinare har Valland Nordli mellom anna gitt ut juleplatene Julekvad (1996) og Lille Messias (2005). I 1998 var ho solist under urframføringa av Magnar Åms Vandrande himmel, skriven spesielt for stemma hennar. Med plata Himmelske balsam og sødeste drue (2001) var ho den første til å spele inn eit utval salmar av husmannssonen Daniel A. Bulie. I 2008 samarbeidde ho med Benedicte Maurseth, Berit Opheim og Kristin Skaare om plateprosjektet Fodne ho svara so stilt, som er bygd på folkemusikk frå Hardanger, samla inn av Geirr Tveitt. Rundt 2007 samarbeidde ho med skodespelar Anne Marit Jacobsen i framsyninga «Nå – Hans Børli med kvinnehånd».

Valland Nordli har fått Ole Bull Akademiet sitt kunstnarstipend, NRKs stipend for unge talent og Fondet for Utøvande Kunstnarar sitt stipend for reise og vidareutdanning.

• folkemusikk
• Ole Bull Akademiet
• salme

• Det Norske Samlaget si forfattarside om Åsne Valland Nordli