Faktaboks

Eli Sollied Øveraas
Fødd
15. august 1949, Ørskog, Møre og Romsdal
Død
15. november 2020, Vestnes, Møre og Romsdal
Eli Sollied Øveraas i 2005.
Eli Sollied Øveraas i 2005.
Av /NTB.

Eli Sollied Øveraas var lærar og politikar. Ho var stortingsrepresentant for Senterpartiet (Sp) frå Møre og Romsdal i tre periodar mellom 1993 og 2009.

Bakgrunn

Eli Sollied Øveraas var fødd i Ørskog i Møre og Romsdal. Ho fullførte realskulen i 1966 og tok sidan ulike kurs innanfor skule og undervisning. Ho var konstituert lærar på Svorta skule i Ørskog i 1971–1974 og arbeidde som vikarlærar i Vestnes kommune i 1974–1993.

Politisk karriere

Øveraas hadde fleire verv i Senterpartiet. Ho var leiar av Møre og Romsdal Senterparti i 1998–2000, gruppeleiar for partiet i kommunestyret i Vestnes i 1999–2001 og gruppeleiar på fylkestinget i Møre og Romsdal frå 1999 til 2003.

Øveraas vart vald inn i kommunestyret i Vestnes i 1987. Ho var formannskapsmedlem i 1991–1995, og seinare i 1999–2001. Ho var medlem av fylkesutvalet i Møre og Romsdal frå 1999 til 2003 og nestleiar i samferdselsutvalet i same fylket i 1999–2001.

Øveraas vart vald inn som stortingsrepresentant for Senterpartiet frå Møre og Romsdal første gongen ved stortingsvalet i 1993. Ho vart samstundes sekretær i familie-, kultur- og administrasjonskomiteen på Stortinget. Ho vart vald inn att på Stortinget i 2001 og vart då igjen medlem av den same komiteen. I 2005 vart ho igjen vald inn på Stortinget, og vart då medlem av transport- og kommunikasjonskomiteen.

Øveraas var samferdselspolitisk talsperson for Senterpartiet i den siste perioden då partiet hennar sat i regjering. Ho kritiserte fleire gongar regjeringa Stoltenberg II i media og var særleg oppteken av at løyvingane til vegar ikkje skulle kuttast.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg