Olav Øyaland

Olav K. Øyaland var fødd i Tinn i Telemark. I tillegg til å spele fele arbeidde han som linjemontør og dreiv seinare garden Brynjulfsrud i Tinn saman med kona Gunnbjørg Øyaland.

Spelet til Øyaland hadde markerte innslag av naturtonalitet, intrikat ornamentikk og drivande rytmikk. Øyaland byrja å spele fele som 12-åring, noko han først lærte av faren Kristen Øyaland og seinare av Johannes Dahle. Dahle førte Øyaland inn i tradisjonen etter farfaren sin, Knut Dahle. I tillegg fekk Øyaland som ein av dei aller første lære slåttar Johannes Dahle sjølv hadde komponert, og desse blei òg ein sentral del av repertoaret hans. Øyaland blir rekna som ein av dei viktigaste vidareførarane av Dahle-tradisjonen, eller det Eivind Groven har kalla «det gamle tinnspelet», som kan førast heilt tilbake til 1700-talet via Håvard Gibøen.

Han vann A-klassa på Landskappleiken to gonger: i 1993, der han delte førsteplassen med Øyvind Brabant, og i 1997. Han var gjennom mange år leiar for Tinn spelemannslag og blei heidersmedlem i Landslaget for Spelemenn i 1992.

I 1995 gav Buen Kulturverkstad ut plata Haugelåt, som inneheld opptak av Øyaland frå perioden 1968–1994. Han var òg representert med to slåttar på utgivinga Håvardspel. Slåttar etter Håvard Gibøen (2009).

• norsk folkemusikk
• hardingfele
• spelemann

• Anne Hytta: «Ein blei mett når ein høyrde det», Årbok for norsk folkemusikk 2007
• Knut Buen: Omslagstekst til CD-en Haugelåt. Buen Kulturverkstad 1995