Hopp til innhold
X
Innhald

Aktivitetstilbod for turistane

Breklating på Briksdalsbreen. Foto: Torje Bjellaas, NRK.

Breklating på Briksdalsbreen. Foto: Torje Bjellaas, NRK.

Utanom overnatting og skyss, vart det tidleg lagt til rette for såkalla «aktivitetstilbod» til turistane: Bøndene vart breførarar og lakseklepparar, og alt i 1891 bygde distriktslege Kloumann eit steinhus for overnatting på det 1848 meter høge fjellet Skåla i Loen - Kloumannstårnet. Frå 1880-talet gjorde mange seg inntekter på suvenirproduksjon.

I nyare tid starta Fjordfly rundflyging med turistar frå base i Loen. Eit forsøk med helikopterturar vart mindre vellukka, og planar om gondolbaner til fjelltoppane på 1970-talet vart ikkje realisert.

Stor utbygging

Alpinbakke med skitrekk kom på Utvikfjellet i 1963, og starta Stryn Sommarskisenter på Strynefjellet, frå 1987 med stort skitrekk. Sjå: «Reiselivsbedrifter i Stryn».

Stryn Skisenter med alpinbakke vart bygd i 1982, og same året vart det store skianlegget for langrenn bygd ut på Ullsheim i Markane. Sjå: «Idretten i Stryn».

I 1992 bygde eidaren Aslak Lefdal stor turistskipskai ved den gamle mølla i Olden. No kunne cruiseturistane stige rett på land, i staden for å bli frakta til og frå skipa i småbåtar. Nordfjord Havn har seinare overteke anlegget, og i 2008 var cruisekaia utvida for 30 millionar kroner.

Videseterfossen er verna. Foto: Ottar Starheim, NRK.

Videseterfossen er verna. Foto: Ottar Starheim, NRK.

Verna naturperler

Jostedalsbreen nasjonalpark vart oppretta 1994, og Jostedalsbreen Nasjonalparksenter i Oppstryn opna av statsminister Gro Harlem Brundtland i 1995.

Via Ferrata Loen

Saman med at Strynevassdraget med den mektige Videseterfossen vart verna mot utbygging i 1993, og at Statens Vegvesen i 1997 peika ut gamle Strynefjellsvegen som ein av våre nasjonale turistvegar, har dette gjort at Stryn kommune framleis kan vise fram eit av dei største landskapa i Sør-Noreg som til no ikkje er råka av utbygging.

Via Ferrata Loen

I 2012 tok Loen Active i bruk ein klatresti med sikring – Via Ferrata Loen. Klatrestien går frå området bak Hotel Alexandra opp fjellet Hoven. I 2013 vart det bygt ei 100 meter lang hengebru i 720 meters høgde over eit juv.

Det er luftig å gå Via Ferrata i Loen, men deltakarane er godt sikra. Foto: Ernst *Riha.

Det er luftig å gå Via Ferrata i Loen, men deltakarane er godt sikra. Foto: Ernst *Riha.

Les også om:

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 29.07.2013