Hopp til innhold
X
Innhald

Bjørnejakt i Årdal

I fjellområda rundt Ofredal leika Bankbjørnen katt og mus med bjørnejegrane. Foto: Kjell Arvid Stølen, NRK.

I fjellområda rundt Ofredal leika Bankbjørnen katt og mus med bjørnejegrane. Foto: Kjell Arvid Stølen, NRK.

Dei store rovdyra, særleg bjørn, gjorde mykje skade på husdyr i Årdal heilt fram på 1900-talet.

På slutten av 1800-talet herja den vidgjetne slagbjørnen «Bankbjørnen» kring Ofredal. Namnet fekk den fordi folk sette pengar på eigen skotpremiekonto i banken. Kjende bjørnejegerar som m.a. Nils Røisum frå Leikanger prøvde å kome på skothald, men «Bankbjørnen» lurte jegerane gong på gong. Stølsbudeiene tende bål og skramla med gryter om natta for å halde bjørnen unna, og i Ofredal fyrte dei til og med av skremmeskot frå saluttkanon. Til slutt vart «Bankbjørnen» skoten av Jakob Bugge frå Ornes i Luster.

Sjur Ingebrigtson Eldegard dreiv mest med reinsjakt (sjå artikkelen Engelskmenn på reinsjakt), men han var og ein kjend bjørnejeger.

Fleire stader i Årdalsfjella sette folk opp sjølvskot (gildre) for å få has på bjørnen. Slike sjølvskot stod m.a. i Bjørnestigen i Geithusberget og i Hjellenakken. Her var det trange gjel som bjørnen brukte opp og ned fjellet.

Den siste bjørnen i Årdal vart skoten i Gjerdesteigen i 1912 av Tomas Svalheim. Den siste sikre observasjon av bjørn i Årdal var i 1948 i Geisdalen ved Tangen.

I Hjellenakken ved Hjellefossen i Utladalen var det sett opp sjølvskot for å få has på bjørn. I framgrunnen hovudhuset på garden Hjelle. Foto: Kjell Arvid Stølen, NRK.

I Hjellenakken ved Hjellefossen i Utladalen var det sett opp sjølvskot for å få has på bjørn. I framgrunnen hovudhuset på garden Hjelle. Foto: Kjell Arvid Stølen, NRK.

Denne artikkelen er ein lokalhistorisk artikkel frå Fylkesleksikon for Sogn og Fjordane. Den er ikkje vurdert som leksikalsk innhald. Ver varsam med å nytte artikkelen som kjelde. 

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 11.09.2018