Hopp til innhold
X
Innhald

Den utrulege Naustdals-ulven

Ulven var ei tung bør for Henrik Berg. Til venstre broren Dagfinn. Foto: Dagfinn Reiakvam

Ulven var ei tung bør for Henrik Berg. Til venstre broren Dagfinn. Foto: Dagfinn Reiakvam

På Bergen Muséum står ein diger hannulv utstoppa. Sjølv ikkje sakkunnige folk kunne retteleg tru at det var ein ulv som vart felt av to unge karar frå Naustedalen ein haustdag i 1950.

Slektningane Dagfinn og Henrik Berg kom frå på garden Berg i Naustedalen. Som born hadde dei nok høyrt forteljingar om kor nærsøkne rovdyra kunne vere inn til gardstuna på Berg i gamle dagar. Tidleg på 1800-talet var ein ulv heilt inne på gardstunet på Berg og naska med seg ei geit. Ein annan gong hadde ein bjørn sett seg fast i ein treslede då han skulle freiste å kome seg inn til nokre oksar i eitt av gardshusa. Bjørnen vart skremd då folk kom til. Den sette oppetter bakkane med tresleden hengande kring halsen. På toppen av bakken knuste bjørnen sleden mot ein stor stein, kom seg fri og forsvann. Men likevel kunne ikkje desse rovdyrsogene måle seg mot det brørne Dagfinn og Henrik sjølve fekk oppleve i Naustdalsfjella ein haustdag i 1950:

Felte eit ukjent rovdyr

Den hausten dreiv Dagfinn Berg og syskenbarnet Henrik Berg og grov ut ei hyttetomt Vonamarka inst i Naustedalen. I nysnøen oppdaga dei spor etter eit rovdyr. Dei tok børse med og fylgde spora til fjells. Ved eit vatn fekk dei auge på eit stort dyr som freista å kome seg unna opp eit skar. Etter nokre skot fekk dei felt dyret. Men ulven var offisielt utrydda for meir enn eit halvhundre år sidan, og dei to jegerane våga mest ikkje nemne fangsten då dei hadde fått det digre beistet til gards.

Ulvejegerane Dagfinn og Henrik Berg kom frå garden Berg ved Nesvatnet. Foto: Kjell Arvid Stølen, NRK.

Ulvejegerane Dagfinn og Henrik Berg kom frå garden Berg ved Nesvatnet. Foto: Kjell Arvid Stølen, NRK.

Vantru distriktslege

Men ryktet gjekk, og folk strøymde til. Heller ikkje lensmannen torde seie sikkert kva dyr det var. Her måtte det tilkallast sakkunnig hjelp. – Og kven var då nærmare til enn distriktslegen distriktslegen i Førde! Og dr. Trygve Bydal torde å seie det som fleire ikkje våga: Det var ein diger hannulv dei to Berg-karane hadde felt – og dette hende på vestlandet og langt over eit halvt hundreår etter at ulven offisielt skulle vere utrydda frå Sør-Noreg! Eit foto som vart sendt til endå meir sakkunnige i Bergen måtte til før alle var heilt sikre på den uttrulege jakthistoria. Naustdals-ulven var eit einsleg streifdyr som hadde trekt vestover. Den vart send til Bergen Muséum for utstopping, og har ved seinare høve vore stilt ut på villmarksmesser i Sunnfjord.

Sjå også: Dei siste ulvane i Fjordane?.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til post(a)allkunne.no.


Sist oppdatert: 15.12.2010