Hopp til innhold
X
Innhald

Fasting-garden i Ortnevik

Nedre Thune i Ortnevik, der Fasting-slekta residerte. Det staselege huset som stod på garden vart rive og truleg flytta til Bulandet. Foto: Merete Husmo Høidal, NRK

Nedre Thune i Ortnevik, der Fasting-slekta residerte. Det staselege huset som stod på garden vart rive og truleg flytta til Bulandet. Foto: Merete Husmo Høidal, NRK

I 1798 kjøpte løytnant Georg Chr. von Fasting garden Nedre Thune i Ortnevik frå eit medlem av Knagenhjelm-slekta i Kaupanger. Fasting høyrde til ei kjend offisersslekt som m.a. hadde greiner til Førde og Vik.

Georg Chr. von Fasting vart kaptein i Ytre Sogn Compagnie i 1803 og busette seg i Ortnevik. Han vart seinare sjef for Voss Bataljon. Både sonen Johan Jacob Fasting (1805-1879) og sonesonen Georg Frederich Fasting vart offiserar og oberstløytnantar.

Fasting-familien bygde eit flott bustadhus på Tune-garden. Dette huset er seinare rive og skal visstnok vere sett opp att i Bulandet i Sunnfjord.

Særleg Johan Jacob Fasting (1805-1879) var ein aktiv kar. Han sette opp lakseverpe, bygde sagbruk og la opp ei 500 meter lang vassrenne for å få vatn til treskeverket. Han fekk også planta ein lang bjørkealle gjennom bygda. Han vart den første ordføraren i Klævold herred (det som seinare vart Kyrkjebø kommune) frå 1853 til 1855.

Les også om: Den eldste historia i Høyanger.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 03.09.2010