Moldøen på slutten av 1930-talet, med handelsstaden lengst til venstre. Foto: Askeland, eigar Aslaug Kambestad Skram/Fylkesarkivet i Sogn og Fjordane.

Handelsstaden Moldøen (Måløyna) vart fram til 1744 drive av same eigarar som på Handelsstaden Vågsberget. Kong Fredrik den 4. overnatta på Moldøen under Noregs-reisa si i 1704. Ole Scmidt, som dreiv Moldøen frå 1838 til 1866, bygde store sjøbuer og ein staseleg hovudbygning på eigedomen. Desse brann ned under Måløyraidet i 1941.

Lensmann Nils Landmark Lem frå Sogndal kjøpte Moldøen i 1902, men flytta aldri dit sjølv. Frå 1915 kom Einar og Audun Lem (sjå Firda Canning under «Fiskeriverksemder i Vågsøy») med som eigarar. I 1921 fekk dei med skipsreiar Jacob Kjøde som kompanjong, og dreiv fiskehandel og tankstasjon på øya.

Frå slutten av 1800-talet overtok dei nye handelsmennene og fiskemottaka i Skramsbygda (noverande Måløy) som det dominerande senter i Ytre Nordfjord, og Moldøen tapte gradvis si betydning som handelssenter.