Høyanger Idrettsforening - HIF vart skipa i 1917, og frå første stund mønstra HIF eige fotballag og turngruppe.

Den store stjerna dei første åra var høgdehopparen Fritz Warendorph. Han kom til Høyanger i 1916, og representerete det ferske idrettsmiljøet i NM i Oslo i 1917. Der tok Warendorph bronse. Året etter vart han Noregsmeister i Stavanger. Warendorph hoppa høgde med ein svært spesiell stil: Utstrekt i stiv «giv akt» svevde han vassrett over lista! Med denne stilen hoppa han 1,85. Warendorph flytta etter nokre få år frå Høyanger.

På 1930-talet var Gunnar Øren - eller «Store-Gunnar» - HIFs fremste friidrettskjempe. Han konkurrerte i alle kastøvingar, og vart Vestlandsmeister i slegge i 1940.

Skiaktivitetane vart lagt til Siplo oppe på fjellet. Her var det hoppbakke, og alt i 1938 vart det arrangert klubbmeisterskap i slalåm. Seinare vart det bygd skitrekk på Siplo.

Les meir om: Idrett og lagsarbeid i Høyanger.

Hopping i HIF-bakken på Siplo. Årstalet er usikkert, men truleg er det ein gong mellom 1925 og 1939. Foto: Eugene Nordahl-Olsen. Eigar: Hydro-arkivet/Fylkesarkivet.