Hopp til innhold
X
Innhald

Straumløyse og småkraftverk

I lang tid var det berre dei sentrale strok av dei øy- og fjordrike kommunane i ytre Sunnfjord som fekk straum frå Ålfotselskapet, seinare Ytre Fjordane Kraftlag - YFK.

Så seint som i 1947 var det registrert nærare 3.000 menneske utan elektrisk straumforsyning i dei to kommunane Kinn og Bru. For Bru utgjorde dette 2/3 av heile kommunen!

Difor vart det på 1930- og 1940-talet bygd ei mengd private kraftverk. I påvente av sjøkabel frå YFK, vart det i 1948 planlagt lokale aksjelag både på Barekstad, Batalden, Tansøy og Rognaldsvåg som skulle byggje kraftlinjer og produsere straum med dieselaggregat. I Flora var det mange som freista å produsere straum med små vindmøller i åra kring 2. verdskrig. I Sogn og Fjordane var det registrert 36 slike, 25 av dei i Flora og Solund.

Kraft frå Sagefossen

På Solheim i Norddalsfjorden vart det i 1951 opna eit lite kraftverk under Sagefossen, som renn ned i Solheimsvatnet. Dette kraftverket forsynte 10-12 bruk med elektrisk kraft fram til 1963, då folk i Norddalsfjorden fekk kraft frå Ytre Fjordane Kraftlag. Under Sagefossen hadde det tidlegare vore fleire sager som nytta vasskrafta frå fossefallet.

Kraftverket ved Sagefossen gav folk på Solheim lys og varme i 12 år. Foto: Ottar Starheim, NRK.

Kraftverket ved Sagefossen gav folk på Solheim lys og varme i 12 år. Foto: Ottar Starheim, NRK.

Les meir om: Kraftforsyninga i Flora.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 11.06.2010