Faktaboks

Jorunn Ringstad
Fødd
3. september 1943, Askvoll, Vestland
Død
12. september 2018

Jorunn Ringstad var politikar og adjunkt. Ringstad var den første kvinnelege ordføraren i Askvoll kommune. Som stortingsrepresentant var samferdselspolitikk ei viktig sak for Ringstad.

Jorunn Ringstad var fødd i Askvoll. Ho var utdanna adjunkt, først frå Bergen lærarhøgskole i 1967 og seinare med tilleggsfag mellom anna i informatikk frå Sogndal lærarhøgskule i 1986. Frå 1967 til 1988 arbeidde ho som lærar ved Askvoll ungdomsskule.

I 1976 tok ho steget inn i lokalpolitikken, og i 1988–1993 var ho den første kvinnelege ordføraren i Askvoll kommune. I 1993 gjekk ho over i rikspolitikken, då ho vart vald inn som stortingsrepresentant for Senterpartiet frå Sogn og Fjordane. Dette vervet hadde ho gjennom tre periodar, fram til 2005.

Ringstad sat i samferdselskomiteen på Stortinget i 1997–2005, men ho arbeidde òg med andre saksområde, til dømes konsesjonslovgiving og helsepolitikk. Ho hadde ei rekkje administrative og offentlege verv, mellom anna i Kommunenes Sentralforbund, som medlem i landsstyret for Norsk Lærarlag, medlem i Utvalet for menneskerettar og i Riksrettsutvalet. Ho var styremedlem i Helse Førde frå 2007, nestleiar frå 2008 og leiar frå 2012 til ho gav seg grunna sjukdom i 2016.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg