Hopp til innhold
X
Innhald

Kvartsgruva på Fløde

Utskipingskaia som Stad Mineral bygde på Otneim er overteken av Ervik Havfiske. Foto: Ottar Starheim, NRK.

Utskipingskaia som Stad Mineral bygde på Otneim er overteken av Ervik Havfiske. Foto: Ottar Starheim, NRK.

I 1972 starta Johan Eide frå Sjøholt på Sunnmøre utvinning av kvarts frå ein førekomst på Flødefjellet på Otneim på nordsida av Stadlandet. Selskapet hans, Stad Mineral AS, fekk bygt ein to kilometer veg opp til førekomstane, og ved sjøen vart det bygt knuseverk og kai. Kvartsen vart levert til Meråker Smelteverk i Sør-Trøndelag. Men førekomstane av kvarts var små, og etter nokre år selde Johan Eide anlegga på Otneim til entreprenør Anders Sande frå Bryggja. Men heller ikkje han fekk lønsam drift og gjekk konkurs i 1986.

Selje kommune tok over kaia og dei andre bygningane på Otneim. Ein del av industribygget der vart ei tid nytta av Stad Pelsforlag til forkjøkken, medan Domstein-konsernet sin Selje Fiskeindustri i Moldefjorden fekk nytte ein stor del av fryseromma som lager for sine produkt.

Kring 1997 overtok fiskeriselskapet Ervik Havfiske A/S heile anlegget og har sidan utvida det.

Kjelder

Kjeldeliste til Fylkesleksikon for Sogn og Fjordane 


Artikkelen er basert på NRKs Fylkesleksikon for Sogn og Fjordane (2001–2014)
Publisert digitalt etter avtale med NRK 2014


Sist oppdatert: 30.12.2009