Hopp til innhold
X
Innhald

Fjordungskyrkje i Askvoll

Askvoll kyrkje. Foto: Ottar Starheim, NRK.

Askvoll kyrkje. Foto: Ottar Starheim, NRK.

Altartavla i Askvoll kyrkje er måla av Anders Askevold. Foto: Vårdal Foto. Eigar: Fylkesarkivet i Sogn og Fjordane.

Altartavla i Askvoll kyrkje er måla av Anders Askevold. Foto: Vårdal Foto. Eigar: Fylkesarkivet i Sogn og Fjordane.

Askvoll kyrkje er bygd i 1863. Arkitekt var kunstmålar Anders Askevold, som òg har måla altartavla. Anders Askevold var også arkitekt og altartavlemålar for kyrkja som vart reist ved Kalvåg i 1865. Før denne kyrkja har det stått tre kyrkjer i Askvoll: Den første kyrkja vart truleg bygd på 1200-talet og er første gong nemnd i 1306. Denne stavkyrkja stod mest truleg på ein stad som framleis vert kalla Kyrkjebakken.

Kyrkja i Askvoll var i mellomalderen den eine av to fjordungskyrkjer (hovudkyrkjer) i Sunnfjord. Den andre var stavkyrkja på øya Bru – seinare omdøypt til Svanøy etter erkebiskop i København, Hans Svane, som fekk Svanøy-godset frå kongen som oppgjer for lånegjeld.

I 1604 vart stavkyrkja i Askvoll riven – med unntak av våpenhuset og klokketårnet – og erstatta av ei ny kyrkje med eit skip som var 17 x 9 meter og eit kor på 5 x 6 meter. Innvendes var denne kyrkja rikt dekorert på veggar og tak av bilete av profetane og andre bibelske personar. To gonger på 1700- og 1800-talet var det brann i denne kyrkja.

Ei ny kyrkje, teikna av arkitekt Normann, avløyste 1600-talskyrkja i 1859, men i 1862 vart den nyreiste kyrkja råka av lynet og brann ned. Inntil den nye kyrkja kunne vigslast i 1863 måtte Askvoll-folket nytte kyrkjene på Vilnes og i Holmedal.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 31.10.2011