Hopp til innhold
X
Innhald

Fresvik kyrkje

Fresvik kyrkje. Til venstre for inngangen ser vi bautasteinen over soldatar som var med i krigen mot svenskane. Foto: Ottar Starheim, NRK.

Fresvik kyrkje. Til venstre for inngangen ser vi bautasteinen over soldatar som var med i krigen mot svenskane. Foto: Ottar Starheim, NRK.

Fresvik kyrkje vart bygd i 1881. Arkitekt var Henrik Nissen og byggmeister A. A. Åse. Altartavle frå 1881 måla av Christen Brun. Nattverdsutstyret er frå 1600-talet, to av dei fire kyrkjeklokkene er frå 1200-talet. Øvrig utstyr i kyrkja frå byggjeåret eller seinare.

Stavkyrkje i Fresvik

Ei stavkyrkje frå 1100-talet vart riven for å gje plass til nyekyrkja i 1881. I eit lite museum i tårnet på kyrkja er det teke vare på ei gamal kyrkjedør, vindauge og ein brurebenk frå stavkyrkja.

Ved kyrkja vart det i 1913 reist ein bautastein over 10 soldatar frå Fresvik som var med i krigen mot svenskane 1807-1814.

Glasmåleri frå Fresvik på Bergen Museum. Foto: Arild Nybø, NRK.

Glasmåleri frå Fresvik på Bergen Museum. Foto: Arild Nybø, NRK.

Sjeldne mellomalderskattar

Frå den gamle stavkyrkja er det teke vare på nokre av dei finaste skattane frå norsk mellomalderkunst: Ein av dei mest kjende skulpturane frå mellomalderen er St. Olav-skulpturen frå Fresvik kyrkje - datert ca. 1200-1250, teken vare på i Oldsaksamlinga i Oslo. I Oldsaksamlinga er også Madonna med barnet, ein 132 cm høg treskulptur frå kring 1250.

Ved Bergen Museum heng Fresvik-krusifikset frå 1235. Det er 77 cm høgt, laga i engelsk stil, og vert rekna som eit hovudverk i angelsaksisk skulptur. Her finst også seks glasmåleri frå 1660 med gamaltestamentlege motiv, og ved Sogn Folkemuseum finn ein eit glasmåleri frå 1600-talet.

Tidleg ute med nynorske salmar

Kyrkjelyden i Fresvik var ein av dei første i fylket som innførte nynorske salmar (Blix-salmar) i 1906.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 15.06.2011