Hopp til innhold
X
Innhald

Utvik kyrkje

Utvik kyrkje. Foto: Ottar Starheim, NRK.

Utvik kyrkje. Foto: Ottar Starheim, NRK.

Utvik kyrkje vart bygd i 1840. Arkitekt var Hans Ditlev Frank Lindstow, den same som teikna Nedstryn kyrkje. Altartavla er frå 1617 og har same stil som preikestolen i kyrkja. Både preikestol og tavle er truleg laga av same handverkar. Ei tidlegare altartavle, måla i 1902 av Anders Orheim er hengd opp på veggen i sjølve kyrkjeskipet.

To altarlysestakar med tysk innskrift er frå 1600-talet. Det er også teke vare på eit sølvstaup og ein altardisk frå 1600-talet. Dei to kyrkjeklokkene er frå mellomalderen. Ein halsring datert 1671 frå gapestokken som stod utanfor den gamle kyrkja, er teken vare på i kyrkja.

Stavkyrkje i Utvik

I Utvik har det vore kyrkjer sidan 1200-talet. Dei første kjeldene om ei kyrkje er frå 1306. Kring 1617 vart det bygt ei ny krosskyrkje i Utvik. Denne hadde våpenhus, kor og eit tårn som var sett opp rett over kyrkjeskipet. På utsida var den tjørebreidd. Denne kyrkja stod til dagens kyrkje vart bygd i 1840.

Tiendebua i Utvik

Like ved kyrkja i Utvik stod det fram til midten av 1990-talet ei såkalla tiendebu der folk i soknet skulle betale den årlege tienda til dei som eigde kyrkja. Bua vart sett opp i 1719, men tømmeret vart teke ned og lagra i samband med ei sentrumsregulering på 1990-talet. Tanken er å få sett opp att bua.

- Les elles om den spesielle Øvresetkyrkja i Breim under Gloppen kommune.

Utvik sentrum med kyrkja. Foto: Ottar Starheim, NRK.

Utvik sentrum med kyrkja. Foto: Ottar Starheim, NRK.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 09.03.2011