Hopp til innhold
X
Innhald

Driftevegane austover frå Stryn

Ei fedrift på Erdal seter med Jostedalsbréen i bakgrunnen.

Ei fedrift på Erdal seter med Jostedalsbréen i bakgrunnen.

Både over Strynefjellet og Kamperhamrane mot Ottadalen og over Hostedalsbréen mot Sogn gjekk det fédrifter i gamle dagar.

Det var storfé og hestar som for det meste vart kjøpt opp på Vestlandet og drive til Austlandet for sal. Tyngda av féhandlarane som opererte i Fjordane og på Møre, kom frå Sogn, men også i nordfjordbygdene finn vi fleire som deltok i denne handelen. Når fédriftene var komne over til gudbrandsdalssida, var det vanlegaste at dei heldt fram gjennom Ottadalen – særleg etter at Gudbrandsdalsbana vart opna fram til Otta i 1886.

Erdalen med garden Greidung. Foto: Kjell Arvid Stølen, NRK.

Erdalen med garden Greidung. Foto: Kjell Arvid Stølen, NRK.

Ein del fédrifter heldt også fram over Sognefjellet til Øvre Årdal og derifrå mot Austlandet. Fédrifter gjekk også over Jostedalsbréen til Jostedalen i Sogn. Når fédriftene reiste gjennom Strynedalen, overnatta driftekarane med buskapen sin på garden Åning i Oppstryn, eller på stølen ved Greidung før dei gav seg i kast med bréen. Ferda over Jostedalsbréen gjekk helst om natta fordi snøen var fastare då enn i solskinet om dagen. Driftekarane hadde med seg lette kjelkar som dei kunne berge dyr med dersom dei trakka gjennom bréen og øydela seg. Siste drifta frå Greidung til Fåbergstølen gjekk i 1920.

Flofjellet

Flofjellet er den kortaste passasjen mellom Flo i Oppstryn og garden Vollset i Frøysadalen i Sunnylven. Dei første åra då Stryn var eigen kommune, høyrde til og med dei øvste gardane i Frøysadalen til Stryn kommune. I gamle dagar gjekk det ein drifteveg over Flofjellet, og også i seinare tid har folk kasta fram tanken om å byggje eit vegsamband på dei få kilometrane over Flofjellet.

Flo med Flofjellet. Foto: Ottar Starheim, NRK.

Flo med Flofjellet. Foto: Ottar Starheim, NRK.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 09.03.2011