Hopp til innhold
X
Innhald

Driftevegar og saltvegar

Frå Grønaskaret er det utsyn over vatnet Torolmen med Sletterust i den bortre enden og Moadalen nedover mot Øvre Årdal. Her gjekk ein av saltvegane for folk frå Valdres. Foto: Kjell Arvid Stølen, NRK.

Frå Grønaskaret er det utsyn over vatnet Torolmen med Sletterust i den bortre enden og Moadalen nedover mot Øvre Årdal. Her gjekk ein av saltvegane for folk frå Valdres. Foto: Kjell Arvid Stølen, NRK.

Frå gamalt av var det ferdsle- og driftevegar over fjella både mot nord og aust: Fehandlarar i Årdal kjøpte m.a. fe på Møre som vart drive over fjella frå Geiranger til Øvre Årdal.

Kom feet frå Sogn, vart det oftast drive over fjellet frå Kroken i Luster til Fardalen i Øvre Årdal. Derfrå vart feet drive opp Moadalen til Breikvam ved Tyin og nedover Valdres til Gjøvik og Toten.

Fram til Lærdalsmarknaden avløyste Lusakaupangen (Kaupanger) som handelsplass på 1500-talet, gjekk det «saltvegar» over fjella mellom Lærdal og Årdal, frå Filefjell gjennom Valdresdalen til Fodnes. Framleis syner fara etter desse vegane, som valdrisane nytta når dei drog vestover for m.a. å handle salt og sild. Valdrisane nytta også «saltvegar» frå Sletterust til Øvre Årdal. Sambandet over fjellet gjorde at fleire valdrisar rydda seg gard i Årdal og Naddvik.

Etter at Kongevegen vart bygd gjennom Lærdal og Filefjell på slutten av 1700-talet (sjå Samferdsle i Lærdal), hadde bøndene i Årdal plikt på seg til å halde ved like visse roder - vegstrekningar - på Kongevegen.

Utsyn over Tyin med Tyinosen nærmast. Neset midt på biletet er Breikvamsodden. På Breikvam til venstre for odden var det oppsamlingsplass for fédriftene. I bakgrunnen ser vi ein del av Jotunheimen med Knutsholstind (2341 m.o.h.) som det høgste punktet. Foto: Kjell Arvid Stølen, NRK.

Utsyn over Tyin med Tyinosen nærmast. Neset midt på biletet er Breikvamsodden. På Breikvam til venstre for odden var det oppsamlingsplass for fédriftene. I bakgrunnen ser vi ein del av Jotunheimen med Knutsholstind (2341 m.o.h.) som det høgste punktet. Foto: Kjell Arvid Stølen, NRK.

Les meir om: Samferdsle i Årdal

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 13.04.2011