Sandane lufthamn
Inn for landing på Sandane Lufthamn Anda. Foto: Ole Martin Rafshol.
Flyplassen på Anda vart opna 1975. Anda vart valt som småflyplass for Nordfjord etter vurdering av Markane i Stryn, Bjørlomona i Eid og Mona ved Sandane sentrum.
Det skulle tidleg vise seg at flyplassen hadde vanskelege innflygingsforhold med mykje turbulens. Fleire gonger skapte turbulens og dårlege navigasjonsforhold «nesten-ulukker». Flyforholda var radikalt betra då det vart installert betre radiofyr og montert «lysgater» i fjellsidene omkring flyplassen, som letta innflyginga.
Widerøes Flyveselskap ASA har sidan starten hatt rutene på småflyplassen i Nordfjord.
I 2009 starta eit stort arbeid med å forlenge rullebana på Sandane Lufthamn med 160 meter. Det vart investert rundt 150 millionar kroner i oppgradering av flyplassen. I samband med arbeidet vart Sandane Lufthamn stengd frå 1. mars til 26. august 2010.
Flyplassbygningen på Anda. Foto: Ottar Starheim, NRK.
Kjelder
Kjeldeliste til Fylkesleksikon for Sogn og Fjordane
Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014.
I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og Fjordane. Dette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til den nye eigaren.
Les meir om overtakinga av Fylkesleksikon for Sogn og Fjordane.
Sist oppdatert: 11.01.2011