Hopp til innhold
X
Innhald

Konkursar og brennevin på gauk

Skjerjehamn. Foto: Merete Husmo Høidal, NRK.

Skjerjehamn. Foto: Merete Husmo Høidal, NRK.

Carsten Jakobsson var kremmar og gjestgjevar frå 1707 til 1716, då han gjekk konkurs. Den som tok over var bergensaren Lars Pederson Møhlen, men heller ikkje han fekk lønsemd ut av det. Skjerjehamn vart selt på tvangsauksjon, men i 1738 greidde enkja etter Lars Pedersson Møhlen, Ingeborg, å kjøpe staden tilbake.

Men ho måtte låne dugeleg mykje pengar for å få det til, og for å dekkje renter og avdrag, sende ho to karar ein sundag til Eivindvik for å selje brennevin på gauk når folk kom ut ifrå preika. Dei fekk selt eit par flasker, men så kom lensmannen og slo ut resten. Ingeborg, som hadde sendt karane, fekk bot.

Møhlen sel

Ingeborg Møhlen (1675-1776) selde Skjerjehamn i 1746 til Berte Katrine Brede, og saman med ektemaken Gabriel Jæger dreiv ho Skjerjehamn i nærare 40 år. Også dei spedde på inntekta med sal av brennevin, tobakk og piper kring kyrkja i Eivindvik.

Jæger selde Skjerjehamn i 1795 til Torgeir Olsson Bjelland og busette seg sjølv på husmannsplassen Blidensol, der han levde av småfiske.

Kortvarig eigarskap

I 1797 vart Skjerjehamn seld til Lars Olsen Helland frå Hosanger. Han dreiv både gjestgiveriet og handelen fram til 1838, då Nathanael Sunde Ross frå garden Rosenborg i Sogndal tok over. Men Ross skulle ikkje verte eigar meir enn eit par år, for då vart Skjerjehamn med brennevinsbula og det heile kjøpt av sjølvaste presten i Gulen!

Les meir om:

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 30.07.2010