Sogn og Fjordane Sjøtrygdelag vart skipa i Måløy i 1928 som eit gjensidig trygdeselskap for forsikring av fiskefarty og kystfarty. Disponent var Bernt Borgundvåg. Seinare endra laget namn til Havtrygd, og utvida etter kvart forretningsdistriktet sitt til heile den sørnorske kysten.

Havtrygd flytta hovudkontoret frå Måløy til Bergen i 1965.

I åra frå 1968 til 1985 hadde Havtrygd eit visst samarbeid med Ytre Nordfjord Branntrygdelag (sjå Selje Brannkasse) ved at Ragnar Hals var forretningsførar for branntrygdelaget samstundes som han var styrar for Havtrygd si avdeling i Måløy. I 1985 gjekk Hals over i full stilling i Havtrygd som då flytta inn i det nybygde Fiskernes Hus i Måløy.

Havtrygd har i dag avdelingskontor i Måløy og Flekkefjord. I 2006 forsikra Havtrygd kring 875 fiskefarty.