Hopp til innhold
X
Innhald

Sogn og Fjordane Friidrettskrins

Marte Rygg Årdal frå Gloppen i sleggeringen. Foto: Rune Fossum, NRK.

Marte Rygg Årdal frå Gloppen i sleggeringen. Foto: Rune Fossum, NRK.

Sogn og Fjordane Friidrettskrins vart skipa i 1922, tre år etter at Sogn og Fjordane Distriktslag for Idrett (idrettskrinsen) vart skipa.

Ragnvald Søreide frå Gloppen vart vald til første leiar. Heilt frå starten i 1922 vart det skipa til krinsmeisterskap. Såkalla pokalkampar vart skipa til kvart år i Nordfjord, Sunnfjord og Sogn. Her vart det tevla i 100 meter, 1500 meter og 5000 meter løp, kule, diskos, spyd, høgde, lengde og tresteg.

Kvinnene kom etter

Kvinnene fekk delta i krinsmeisterskapen for første gong i 1931 i øvingane 60 meter og høgdehopp, men det var først etter 2. verdskrig at det vart skikkeleg driv i friidretten for kvinner i fylket.

Få skikkelege baner

Få skikkelege baner

Friidrettskrisen skipa til det første trenarkruset i Høyanger i 1933 for i alt 22 påmelde. I 1935 fekk fylket eit eige autorisasjonsråd for dommarar.

Før 1945 var det berre Florø, Førde, Høyanger og Sandane som hadde skikkelege idrettbaner med rundbane for friidrett. Også på ei bane i Stongfjorden kunne det skipast til større stemne.

Asbjørn Hansen den første store

Organisert idrettsaktivitet låg nede under 2. verdskrig. Det første krinsstemnet etter freden vart skipa til på Kronborg i Førde den 4. juli 1945 med 50 deltakarar. Her vann Asbjørn Hansen frå Sandane 1500 meter suverent med 4.09.5. Hansen vart den første store friidrettsprofilen frå fylket, og tok NM-gull på 1500 meter i 1946.

Dette biletet er teke på eit friidrettsstemne i Angedalen i 1946. Stilen til høgdehopparen og utstyret er litt annleis enn i dag. Foto: Dagfinn Reiakvam.

Dette biletet er teke på eit friidrettsstemne i Angedalen i 1946. Stilen til høgdehopparen og utstyret er litt annleis enn i dag. Foto: Dagfinn Reiakvam.

Landskamp i Årdal

I 1979 gjekk friidrettskrinsen inn i samarbeidsorganet Friidrett Vest. Same året vart det første, store internasjonale friidrettstemnet skipa til i Sogn og Fjordane, då det vart halde trelandskamp i Øvre Årdal.

Håkon Fimland (t.v.) tok mange NM-titlar på 110 meter hekk, ofte i tett kniving med Kjellfred Weum frå Luster (t.h.) Biletet er frå ein landskamp mot Belgia, Nederland og Luxembourg. Foto: Knut Edvard Holm, utlånt av Håkon Fimland.

Håkon Fimland (t.v.) tok mange NM-titlar på 110 meter hekk, ofte i tett kniving med Kjellfred Weum frå Luster (t.h.) Biletet er frå ein landskamp mot Belgia, Nederland og Luxembourg. Foto: Knut Edvard Holm, utlånt av Håkon Fimland.

Frå 1982 har friidrettkrinsen hatt eigen fortetningsførar. Den første var Odd Skrede, Førde. I 1997 hadde fylket i alt 19 400-meters rundbaner med seks løpebaner, og 13 rundbaner som er kortare enn 400 meter. Sju baner var i 1997 utstyrte med kunststoffdekke.

Eitt av dei gode kasttalenta i Sogn og Fjordane, Trude Raad frå Gloppen. Foto: Sander Heggheim, NRK.

Eitt av dei gode kasttalenta i Sogn og Fjordane, Trude Raad frå Gloppen. Foto: Sander Heggheim, NRK.

Same året var det registrert idrettshus og idrettshallar i Askvoll, Atløy, Aurland, Balestrand, Eid, Fjaler, Florø, Førde, Gaupne, Høyanger, Innvik, Sandane, Sogndal, Stryn, Svelgen, Vik, Øvre Årdal og Årdalstangen, og sidan er Naustdalshallen, idrettshallen på Hermansverk, Lærdalshallen og storhallane Sognahallen i Sogndal og Nordfjordhallen ved Måløy komne til.

I 2011 vart senior-NM i friidrett avvikla på Byrkjelo. Foto: Rune Fossum, NRK.

I 2011 vart senior-NM i friidrett avvikla på Byrkjelo. Foto: Rune Fossum, NRK.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). 

Publisert digitalt etter avtale med NRK 2014.

Artiklane i fylkeleksikonet blir dessverre sjeldan oppdaterte, grunna manglande ekstern finansiering etter at Allkunne tok over artiklane frå NRK. Meld gjerne frå om feil eller manglar til allkunne(a)allkunne.no.


Sist oppdatert: 17.10.2011